خَير ماأبداء بِه بسم الله ويليها سلاماً من الله عليكم جميعاً
خلونا نشوف وش عندي:d
هذا سلمكم الله أنا وأختي مره كنا رايحين زواج مُجبرين عليه ولحالنا بعد ضغط الوالده الله يطولنا بعمرها ماحد نعرفه " زوج بنت الجيران من باب تأدية الواجب حضرناه" فعرفنا نشغل أنفسنا بالحشّ " الله لا يطمس على قلوبنا بعد ماهدانا "
و للأمانة كانت تعليقاتنا في البداية بخلق الله عفويه
إلى وتطمر وحده من عندنا كل شعرها بنس يعني مافكت تسريحه شعرها التسريحه اللي كلفاتها فلوس
أنا التفت لأختي وقلت شوفي مافكت البنس
بيني وبينكم ضحكنا ضحك مو عشان بس شعرها كله بنس لا بس لاننا ودنا نضحك ودنا نطلع من جونا المُمل > ماللخطاء عذر مُقنع " على قولة اصاله
وتدور الدنيا ويجي يوم عرس أختي وتقوم الكوفيره وعلى حسب مود تسريحتي وتملى شعري بنس
مع مراعاة وتعقيب الضيافة وإكرام واستقبال الضيوف والإشراف على العرس فكيت نص البنس ونسيت الباقي
محسوبتكم طلعت للجمهور ونص التسريحة ماانفكت طبعا تعالوا شوف ضحك العالم
ممكن نُقول الان :
لاتضحك إلا على صايم ولا مصلي
وهذا سلمكم الله اخوي بشوارع الرياض كنا ماشين في سبيل حالنا مادرينا إلى واحد قدامنا مدرعم ونسى ان الاشاره حمراء شوي الى سمعنا صوت فراملات قويات >> تسمع بالفرامل بس ماتعرف جمعها
الحمد الله ماصار شيء بس شكل الولد وهو مفهي وبوسط السيارة خلى اخوي يمسك بطنه من الضحك والله كأني اسمع أمي تقوله " ياوليدي لاتضحك ربك سِتر عليه "
وأخونا يضحك
مالفينا السيد الثاني إلى واخوي الغالي متحمس بالسوالف وصار له نفس اللي صار من قبل ربع ساعة لاتسالوني عن ذيك الساعة وش كان وضعنا لأني أقول الحمد الله على سلامتنا واخوي فتح افمه من هول الصدمة
هنا نقول بعد
لاتضحك الا على صايم ولا مصلي
أخر سالفه عشان ماذبل كبودكم
هذي بنت خالتي مايمر عليها شهر إلى طاقة جوال جديد
البنت مو بطرانه ولا فسقانه لكن يمكن وقلت يمكن عشان ماتقولون موسوسه
نقول عين ماصلت على النبي أو يمكن مالها نصيب بالجوال
طيحة جوالها وشاشة سوداء تعودنا عليها خلاص
إلى ويجي مره ويطيح قدامنا
هنا كل العائلة الكريمة ضحكت وبعدها أمي قالت كلمتها اللي كنت اسمعها منذُ نعومة اضافري
" لاتضحكون الواحد لايضحك إلا على صايم ولا مصلي "
طبعا الكل وقف ضحك إحتراماً لمشاعرها ماعدا أخوها
وقبل لايطلعون من البيت تزحلق جوال أخوها من باب البيت الين بجفرة نخله بالحوش طاح
يعني زود على الشخابيط اللي شوهه بلاط الحوش زود على موية وطين
يعني على قولة أمي لاتضحكون الا على صايم ولا مصلي .,
عرفتوا اتوقع وش مقصودنا من هالجمله
"نضحك على مصلي عشان نصلي ونضحك على صايم علشان نصوم"
يتبع