[محمد جفال]

الشعر سحر البيان ولذة السامعين
الشعر صوت المشاعر وانفعالاتها
الشعر احاسيس ناسٍ نصفهم راحلين
انقلّب اقلوبها ونشوف نياتها
الشعر صوت القلوب اللي ذبحها الحنين
ان كان بعض الحناجر غابت اصواتها
الشعر حاله تجي مع طيحت الدمعتين
عند ابتهاج الخواطر وانكساراتها
الشعر هيبه تزلزل وقفت المعتدين
اقسى من اللي تفجّ الصدر طعناتها
الشعر ديوان فيه نقابل الاولين
لو انها في قبورٍ يوحش اسكاتها
والشاعر اليا قصر شعره عن الوالدين
يعني عقوق المشاعر وانعكاساتها
وانا مدين وعجزت اوفي ديون الثنْين
لا يابعد زهرة الدنيا وضحكاتها
ابعد عن الناس بعيوني ..من الفرقدين
وعلاقه ..اكبر من الناس وعلاقاتها
ياوجد روحي ليا قالو من الطيبين
ياطيب ذيك الوجيه وطيب نياتها
صرنا نغيب ونجيهم بالسنه مرتين
والنفس كثرت حسانيها وسياتها
نركض ورا الرزق ونجاهد ظروف السنين
تضحك علينا الليالي في ملذاتها
مدري هي النفس خلتنا كذا غافلين
ولا ظروف الليالي هذي سواتها
ايو الله انا بحاجة دعوة الوالدين
تقتل ثعابين غفلتنا وحياتها
ونحتاج دعوة مريض ودعوة مسافرين
تلحق بعدها النغوس الصلف غاياتها
على ركايب يبادلها الرغى والحنين
ماهو على اللي تولع نور لمباتها
ونحتاج مسحه على راس الصغير الحزين
اللي فقد ضحكة امه وابتساماتها
ونحتاج ركعة وثلثين العرب نايمين
في حزة تسمع الساعة ودقاتها
هذا علاج القلوب وكل خافي يبين
حياة الانسان تكشفها محطاتها