[عدوان السرحاني]

وحدي على ساحلك يالنورس البحري
جيت اقطع الما سباحه وارضي جنوني

احيان اقول انّي البحار من صغري
وان قامت الريح تعجز تطرق ردوني

بعضي هناك وهنا وتقول يا كثري
ياكثر بعضي وكلّي صدق وشلوني ؟

بعد الغياب ادفن برمل البحر عذري
واشعل مدى ساحلك واضوي سما كوني

واهديك فجر ٍ لبس فستانه الزهري
فجر ٍ سرق ضحكتي واهدى البحر لوني

يافجر سامح أبـ اكسر حلمي بصدري
واكتب قصيدة عزا لو تبكي عيوني

مبطي وانا فاضي اهدي واعبث بعمري
واغزل من ايامي احلامي على هوني

فجأه.. و جف الندى حتّ الورق بدري
سال اخضري والهبايب ساقت مزوني

كذاب من قال :... يتساقط ورق كُبري
واملا يدي بالورق واقول حتوني

مدينتي ، والنخيل ، و ثرثرة : فجري
أشيا بسيطه وذكرى من تناسوني

واذكر " مها " أشبه بقطرة ندى تجري
فوق ورقة فزّزت عصفورة غصوني

تلبس ثياب الصباح ، و يستحي كبري
واحسّني ضحكة اطفال ٍ تحروني

يا توتة المرْج يا .. صفصافة القمري
متى العصافير والقـُمري يغنوني ؟

دنا هديل ، و غنا مرّ لهنا ... يغري
حقيقته دغدغت حوريّة شجوني

ما ظل ّ شي .. والحدايق انكرت عطري
وضيوفي اللي عزمت ابطوا ولا جوني

رحلت قبل ... انكسر ويخطني حبري
وسوالف وكان ياما كان يرووني

كيف اجرح الغيم ويسيل المطر شعري
كيف اجرح الشعر واكتبني ويقروني

يا نورس الما نزفت ولا نزف صبري
لو مالت الأرض تتركّى على متوني

هذي هي الذكريات الموجعه ، وادري
إني ابـ ابكي عليها لين يبكوني

عدوان المنديل السرحاني
الجوف..