|
رد : علمتني قسوته رواية روووعه
صلاح: انبسطتي حبيبتي
ليال: الحمدلله
صلاح: ودي اقولك على خبر حلو
بوسلطان: انا الي بسألها قبل لاتقول لها
ليال: خير يبا
بوسلطان: اختك تكلم احد
ليال: مافهمت
بوسلطان: اختك على علاقه بأحد مثلك
ليال: انا لي علاقه بزوجي يبا
بوسلطان بحده: تحلفي انك ماكنتي تعرفيه قبل الزواج
صلاح: يبا الله يهديك حنا منتهين من هالموضوع
بوسلطان: انتظر حلفك
ليال: ....................
بوسلطان: خلي هالجمله براسك.. انتي وطيتي راسي قدامهم.. لاتنسي هالشي.. عمك قال لي انه يبي يعجل بالزواج.. وانا وافقت.. قلت في نفسي.. استر عليكي ابرك من الفضيحه
ليال: ماهو انا الي اعمل لك فضيحه يبا.. انا تربيتك
بوسلطان: اجل ليه ماحلفتي
ليال: ما اقدر احلف كاذبه.. بس من يوم حادث البحر انا ما كلمته.. وهذا هو جا لحد عندي.. ماهو انا الي تغلط.. اسمك مستحيل اخلي احد يدوس عليه.. انا ليال بنتك ابيك تكون واثق من هالشي
بوسلطان: صدمتي فيكي تمنعني من الثقه فيكي من جديد
ليال: اسمحولي.. انا بغرفتي
سوسن: ليال حبيبتي.. انتي هنا
ليال: هنا ياعمري
سوسن: شكلك مرتاحه.. انبسطتي
ليال: تعالي معاي احكيلك ايش صار معاي
صلاح: وانا ماتبين تحكين لي
ليال: اذا ودك تعال ماعندي شي اخبيه.. انا بحياتي ما خبيت شي
قلتها وانا عارفه اني كاذبه كنت ابي اشتري خاطري ابوي.. كان ودي اقوله عن جاسم كان ودي ابين له قد ايش انا شلت بخاطري عليه.. كان ودي يعرف ناصر قد ايش ساعدني وحافظ علي.. رجعت وقعدت جنب صلاح رحت اقول لهم عن كل شي.. كل شي.. انا عارفه انه اهلي ستر وغطا علي.. امي كمان جات واخذت مكان لها تسمع مني ايش صار.. صارت تتفاعل كل ما قلت لها ناصر عمل بعبير كذا.. وهي تقول جعلها بزياده .. واقول لافي عمل فيها كذا.. وهي تقول تستاهل الي عمله فيها هذي مثل خالتها ماقالت تربية اجانب.. رحت اقول لهم عن لافي وكيف تعاملت معاه وكيف لعبت عليه وكيف انهم يتكلمو بلغه انا عارفتها وهم مايعرفو عني.. ابوي كان مجرد مستمع بس كنت اشوف نظرة الفخربعيونه.. بس الاهم عرف اني ماني هينه ماينلعب علي.. انا ليال النشمي
بعدها باسبوع.. كان زواجي.. انتهى كل شي على خير.. كل الي ابيه كان يصير ويتحقق صحيح التفاصيل ماكانت مهمه انها تنذكر بس المهم اني حفظت الدرس اول شي طلبته من ناصر نسكن بشقه لحالنا.. وهو يروح لامه وابوه وقت مايحب.. صرت ارتاح وقت الي ابي.. صرت العب الوقت الي ابي عشت احلى سنه بحياتي معاه.. الدلع كان من نصيبي لحالي.. ناصر ماكان يرضى اني ادلعه.. كان يحب انه يدلعني.. لافي اجل سفرته سنه كامله.. حتى نسافر انا وناصر معاهم ماكنت الومهم ناصر وحيدهم وهم متعلقين فيه.. بس انا كان ودي اننا نكون مستقلين بحياتنا.. كنت ابي ابتعد عن المشاكل او الاحتكاك بعبير.. صرت اتجاهل وجودها حتى لوكانت قريبه مني.. كانت عارفه اني ما اطيقها ما احبها.. فكانت تحاول تتقرب مني يمكن خوف من ناصر او من لافي الي توعدها قدامي وهي تعتذرلي مره ثانيه بعد زواجي.. الجده ياروحي عليها كانت هي البلسم كانت هي عشقي من جد ماحبيت احد بحياتي زي ما حبيت هالحرمه.. وصرت اتغزل فيها قدام فتحيه الي صارت من اغلى صحباتي.. صحيح هي اكبر مني بس هذا مايمنع اننا نكون اصحاب.. سوسن ياحياتي تعيش احلى قصة حب مع زوجها.. عبدالله ولد خالة ناصر.. ام عبدالله من شافتها وهي عاجبتها.. يوم الي قالي صلاح انه عنده خبر حلو.. كان يبي يقول انه بوعبدالله لمح لهم انه وده يجي بيتنا عنده طلب.. لما تمت الخطوبه كنت بطير من الفرح.. سوسن حبيبة قلبي جنبي بكل شي..
تخرجت.. وبمجموع عالي.. الي ابيه حصلت عليه.. كان ودي اكمل كان ودي اوصل لحد الدكتوراه بادارة الاعمال.. بس سفر لافي الغى مشاريعي الدراسيه بهالوقت.. وماكنت اقدر اني اتدلع اكثر من كذا كفايه انه اجل سفره سنه كامله عشاني
بعد زواج سوسن.. سافرنا على لندن.. طلعنا من مطار هيثرو.. وركبنا ليموزين فاخره.. كنت تعبانه من السفر وكان ودي انام.. رميت براسي على كتف ناصر ونمت.. انتبهت انه يصحيني
ناصر: حبيبتي وصلنا
ليال: اه ..ناصر
ناصر: روحي انتي
ليال: انا دايخه..راسي تلف بقوه
ناصر: اكيد من الطياره.. خليني اشيلك
فتحت عيني وانا لسا بفراشي.. احس بألم براسي.. احس بألام بجسمي.. كنت ابي اقوم ماقدرت.. كنت ابي اطرد النوم من عيني ماقدرت.. قلت اصبر شوي يمكن فعلا من تأثير الطياره على وخصوصا هذي اول مره اركب طياره.. اخذت نص ساعه لحد ماقدرت اجمع قوتي وقمت.. طليت من الشباك حسيت الدنيا تلف فيني.. مسكت الكرسي القريب مني وجلست عليه.. اخذت كم دقيقه وحسيت ناصر دخل
ناصر بخوف: حبيبتي مالك
ليال: انا بخير ياروحي بس لسا احس الدنيا تلف فيني
ناصر: خليني اجيب لك مويه
ليال: ياريت.. ريقي ناشف
دق على المطبخ وقال للخادمه تجيب المويه وانا جالسه ماني بحاسه بجسمي.. صدق كنت متملله من هالشعور.. كنت مخططه اني اروح والف الليله بلندن.. كنت مبسوطه وانا بالسعوديه اني راح اجي.. بس الان التعب قتل فرحتي وصلت الخادمه ودقت الباب.. راح ناصر يفتح واخذ منها كاسة المويه وشربت منها.. ارتحت شويه بعد المويه الي شربتها.. بعديها قدرت احرك جسمي وانزل مع ناصر للطابق الارضي.. لقيت الكل مجتمعين
نوف بتريقه: اقول كأنه جو لندن ماجا على هوا ناس
العنود: تقولي فيها.. شوفي شكلهم كيف دايخ
نوف: اقول العنود ايش رايك نرجع السعوديه ونرحم ناس
العنود: هههههههههههههه عني انا مستعده بس خلينا ناخذ راي ناس
ليال بتعب: صدقوني انا قلت اني بلف الليله لندن بكبرها.. بس من صدق تجري الرياح
ناصر: معلش ياروحي.. ترتاحي ونلف لندن بعدين
نوف: وليه العذاب هي ترتاح وانا الف معاك ياحلو
ليال: وانتي حاشره نفسك يعني
نوف: لا بس انا قلت الف بدالك وانتي انبسطي
ليال: حلوه هذي انتي تلفي وانا انبسط
لافي: هههههههههههههههه ارتاحي يبا وبعدين اعملي الي تبينه
ام ناصر: حبيبتي جوعانه
ليال: لا خالتي.. ماني حابه اكل
لافي: ليه يبا
ليال: شبعت من اكل الطياره
العنود: أي اكل الطياره الي شبعك ذا.. هذا مايشبع العصفور
ناصر: يعني انتي جعانه يعني!!
العنود: ومحسب اني بنتظر زوجتك لحد ماتصحى واكل معاها.. انا اكلت من اول ما وصلت.
ليال: عليكي بالعافيه يا عمري
العنود: يعافيكي ياروحي.. اقول امي طلبت من الطباخ يعمل كم اكله كذا على مزاجك.. وحنا جالسين نستنا الاميره النائمه لحد ماتصحى
ليال: نستنى؟ مين يستنى
العنود باستغراب: كلنا
ليال: هم اكلو شي يعني ولا بس انتي
العنود: لا بس انا
ليال: ودامك اكلتي ليه حاشره نفسك بين الجياع
العنود: هههههههههههههههههههه عشان انا لسا جعانه
نوف: اعوذو بالله.. هذي اذا ما لقت شي تاكله.. بيجي يوم بتاكلنا كلنا
لافي: قومو شوفو الخدم جهزو السفره بلا كثر حكي
العنود: حاضر
لافي: نوف
نوف: سم بابا
لافي: نادي عبير.. وقولي لها بابا يقول بتقعدي مع الكل دام الكل مجتمع
نوف: حاضر بابا
العنود: السفره جاهزه ياحلوين
قمت مع ناصر وهو ساندني.. جلست على الكرسي وانا لسا دايخه.. كنت اشوف انواع الاكل الانجليزي قدامي.. احس اني قارفه منه.. كان ودي اقوم.. خفت انه احد يجبرني اقعد.. بس كان ودي اقوم.. لما ابتدو يغرفو وياكلو كنت حاسه غصب علي اني ابي افرغ الي ببطني منظرهم كان مقرف.. ناصر غرف لي من الاكل وخلى الصحن قدامي.. فزيت من مكاني ورحت لحد المغسله وفرغت الي ببطني.. حسيت بالام تقطع بطني.. كنت اصرخ من المي.. وقتها حسيت روحي بتطلع.. شفت الدنيا سوده قدامي غمضت عيني وارتحت.
&&&&&&&&&&&&&&&&&&&&
- معقوله لافي سمم ليال
- ليه يكرهها كل هالكره.. بس هو يكرهها ولا هي واهمه
- ايش بيحصل لابطال القصه اذا ماتت ليال
- ليال ماتت صدق؟!!
احداث جديده ومثيره
تابعوني
|