[إبراهيم الوافي]

الرسالة الأصلية كتبت بواسطة مسفر الدوسري

نص جديد أتمنى أن يرتقي لذائقتكم،

لو أنا ماقلت ..أحبك..
هاللحظه
تدرين اشيصير؟!
بينبت على درايش الصبح..
السهر
ويخاصم الدنيا قمر
والشمس تنسى وجهها..
على
وسادة الليل الأخير!!
إنتي تدرين..وش يصير
لو أنا ماقلت هاللحظه
أحبك
للجدايل فوق متنك
إنتي تدرين وش يصير؟!
بيسيل فالدنيا الظلام
وتمتلي فيه المواجع
ويكثر الليل فالأصابع
وتنطفي من فوق نجمه
تحرس أحلام الشوارع
والنهار بيصير عمره
حتى أقصر..من قصير!!
شفتي شاللي.. راح يصير؟!
أنا لو ماقلت لعيونك..أحبك
بيبس العشب الطري
فالبحور
وطرف كاحل
والمراكب تغرق بحضن السواحل
والمواني ماتلوّح..
في مناديل الوداع..
للي راحل
وبيرخص اللولو ..كثير!!
شفتي شاللي ..راح يصير؟!!
لو أنا ماقلت أحبك..
لليمام اللي على صدرك
يهجّ..
من هدوم أشجارنا اللون الخضر
واللي يبقى من العمر
نقْضيه ياعمري نعدّ
كم مات.. من الربيع
وكم ربيع..
فينا انكسر
وكم باقي من كِدَر
وكم بقى ونحسّ..
ماباقي كثير!!
شفتي شاللي..راح يصير؟!
لو أنا ماقلت لكفوفك ..أحبك
صدّقيني
كل شي ناعم بيزعل
وكل شي مخمل بيسأل
وكل شي أجمل بيذبل
وأنا أدري
راح تكمَلْ
لو أمدّ صوتي..
ويخاصمني الحرير
شفتي شاللي.. راح يصير؟!!!

تسقط الشمس .. فتتلقَّفها السماء يامسفر ...
كذلك القمر لم يخجل من غزل الشعراء يوما ، وهم في المقابل لن يتوقفوا عن مغازلته ...!
.
.
لاجديد .. مع كل جديد إلا ماهو أجدّ ياصديقي ..من قراءةٍ للتفاصيل الصغيرة حتى بصفحة الضباب ، وانتقاء الشذى وتخليصه من سحابات الغبار .. هكذا أنت منذ قرأتك أول شهقة .. شاعر العفوية المثقفة ، والثقافة العفوية ، كأنما أعتدتَ دائما على أن تجمع قُبلة الكلام الحنون بشفاتنا ...
عليك دائما أن تقول يامسفر ، وعليها أن تصغيَ لحنان الكلام .. وعلينا نحن أن نتماهى مع سيرة الصدق والصدّيقين ...!
صباحكَ أنتَ ..!