اخوي الغالي محمد العمري
يا هلا والله وغلا يابو خالد والف الف شكر على اطرائك الجميل يا فيلسوف شعبيات الانيق ابو نظارات مضروبه من امهات التخفيض ب 275 ريال
حبيبي والله الف شكر على كلامك الجميل
وردا على اسئلتك يابو خالد :
1. تتحدث دائماً عن ( طنبق طنبق ) سواءاً في المنتدى أو في الجلسات الخاصة ..
هل هناك شعراء في الساحة الشعبية من نوع ( طنبق طنبق ) ؟!!
وإن وجدوا فعلاً كيف تستقبل نصوصهم وانت بينهم وكيف تستقبلها وأنت خلف شاشة الكمبيوتر ؟!!
يا كثر اهل طنبق طنبق يابو خالد اساسا الساحه الشعبيه والعنكبوتيه مكونه من 9000 شاعر من فئه طنبق طنبق و 50 شاعر حقيقي
وفي شعبيات يوجد 30 شاعر من هال 50
عاد يبقى 20 وزعهم انت براحتك اخاف يزعل علي السحيمي ويقول تقصد النداوي ما فيه والا المرقاب ما فيه وهذول جماعه عندهم رشاشات وانا ماني ناقص اصابات
اما بالنسبه كيف استقبل نصوصهم فيعتمد على مدى تقبلهم للنقد او اذا صح التعبير مدى تقبلهم للراي الاخر اذا كان الرجال الي قدامك يتقبل اراء الاخرين مهما كانت متوافقه او مخالفه لاراءه فتجدني انقاشهم وابدي رايي ولكن اذا شفت الي قدامي يحسب انه بيل كلينتون الشعر الحديث يعني اقوى شاعر بالوجود وما فيه اي مجال للاقناع او النقاش فالنقاش هنا يكون مضيعه وقت ومجهد لي ومقرف لمن حولي لذلك اكتفي بقول صح لسانك ويعطيك العافيه ويتهيء لي بيت عبدالله مران يشهد وانت خابر بعض الامور يا معلم فيلسوف بيه باشا افندم
2. تكتب التفعيلة وتكتب القصيدة العمودية ... بإجادة
مع ذلك تذهب المواقف الحقيقية للتفعيلة ( غالباً )
وتذهب قصائد الفكرة والقصائد الساخرة للعمودية ..
فما السبب .. ؟!!
والله يابو خالد ان جيت للحق فانا مو من النوع الي يحدد كيف باكتب القصيده هذه قبل الكتابه الفعليه لها
يعني اذا طلعت القصيده تطلع ومادري كيف تطلع تفعيله عامودي اهم شي انها تطلع
هذا طبعا من ناحيه
من ناحيه اخرى قد يكون كلامك صحيح ويكون توجهي في المواقف الوجدانيه للتفعيله اكثر بطريقه غير مباشره وغير مقصوده وقد يكون السبب في ذلك ان التفعيله تعطيك مساحات اكبر للتعبير ولكن لدي بعض القصائد الوجدانيه عاموديه كقصيده "مأساتي" وقصيده "اخاف الله" وغيرها من القصائد الوجدانيه او التي تعبر عن مواقف حقيقه عاموديه
3. حدثنا عن سبب توقف مشروع تعاونك مع الفنان راشد الماجد .. ؟!
ههههههههههههههههههههههههههه بسم الله الرحمن الرحيم
انت وش دراك يابو خالد
بديت اشك انك مباحث لان الموضوع هذا ما يعرفه الا ناس تنعد على الاصابع وما اذكر اني حكيت لك عنه بس اكيد سبب مصايب فيصل الخالد الاستاذ نكبه "محمد الشهري" هو الي قال لك
عموما
الموضوع توقف بسبب كسلي وعدم متابعتي وخوفي من العواقب طبعا من ناحية الفنان راشد الماجد المساله بالتاكيد مساله اولويات فلا استطيع القول اني السبب الوحيد في توقف هذا التعاون
والموضوع بكل بساطه اني كنت مستضاف في احدى اذاعات الخليج وسمعني مدير اعمال الفنان راشد الماجد وطلب رقمي من الاذاعه فاعطوه واتصل بي وطلب مني بعض القصائد وطلب القائها وتسجيلها وطلب طلبات اخرى ونفذت بعض المتطلبات وتكاسلت عن البعض الاخر ولم اتابع ولن اتابع مع احترامي الشديد للفنان راشد الماجد ولكني عندما فكرت فيها وجدت اني ماني ناقص احمل ذنوب او اشارك في ذنوب ولو اعيدت الكره لرفضت من البدايه والله يبعدنا عن هالطريق يعني لاول مره كسلي ان شاء الله حماني لاني بكل صراحه ضد فكره الاغنيه او المشاركه في ذنب والله الي يهدي الجميع والله يحمينا من ضعف انفسنا والحمدلله على كل حال
4. ماسر شعبيتك الكبيرة في مملكة البحرين ..؟!
والله يابو خالد المساله مساله تواصل
انا كنت متواصل بصفه مستمره مع الاخوه في البحرين وفي الساحه الشعبيه البحرينيه وكنت عضو في جمعية الشعر الشعبي البحريني وكنت احضر امسيات بعض الاخوه واحضر جمعات الجمعيه على قد ما اقدر والاخوه كرماء جدا دائما يطلبون مني قصائد للنشر ويحتفون فيها احتفاء رائع وللمعلوميه انا اول ما نشرت نشرت بالاعلام البحريني وهو اعلام كريم جدا ولا انكر فضل الله ثم فضل الاخوان في جريده اخبار الخليج وجريده الايام وجمعية الشعر الشعبي والشيخ خالد ال خليفه والاستاذه - مبارك العماري وعبدالله الدوسري لانهم ناس فعلا يحتفون ويقدرون
وانا متأكد لو انك تواصلت معهم نفس التواصل يابو خالد لوجدت نفس الشعبيه ونفس الاحتفاء على اقل تقدير لانك شاعر افضل مني بمراحل -- ابسط يا عم -- واي انسان يتواصل مع اي اعلام تاكد انه سيجد احتفاء ثمرة هذا التواصل اذا كان يستحق شعريا طبعا
وهلا بك يابو خالد يا فضيحه خليتنا نفضفض بالي كنا ناسسسسسسسينه