[عثمان العبدالله]

[poet font="Simplified Arabic,4,blue,normal,normal" bkcolor="transparent" bkimage="backgrounds/5.gif" border="none,4,deeppink" type=0 line=200% align=center use=ex length=0 char="" num="0,black" filter=""]
قالوا قضيت من الهوى قلت لا لا = ما ظني اقضي لين ما تدفنوني
قالـوا تحب وشيب راسك تلا لا = قلت المحبّـة علتي والجنوني
قالوا حبيبك ، قلت مثله محالا = بالجـن او بالإنس كاين يكـوني
سيد المهـا سيد الغنج والـدلالا = لا سلهمت فالموت سهم الجفوني
قـالوا تحبّه قلت فـوق الخيالا = ما اتـوب عن حبّه ولو يمنعوني
حبّـه بقلبـي راسخٍ كالجبـالا = ومن كثر ما احبّه يحرك شجوني
ازعـل إذا شفته لغيري تحالا = ومن غيرتي يمكن يخيب ظنوني
قالـوا يحبّك قلت صعب السؤالا = إن كان تـدروا يالمـلا خبّروني
قالـوا هجيته ما مدحت الجمالا = وغيـرك يبيّن ما بها من فتوني
قلت المحبّـه بالفعـل لا المقالا = ما هي نفاق وكذب لاجل الزبوني
ابي حبيبي نجـم صعب المنـالا = واحسب حساب لعاصفات السكوني
يهـوي من العـالي لقاع التلالا = من طامعٍ نـاويه دايـم يموني
ياخذ حبيبٍ ما ارتضي له بـدالا = ويمكن تحبّه مادرت عن طعوني
وشلـون أسوّي بعدها من فعالا = الموت أهـون من حبيبٍ يخوني
ويمكن تعيش الذل في كل حـالا = ويمكن تـلاقي من عـذابه فنوني
ان خفت يا حبـي فقبلك مثـالا = كم درةٍ وخـذت بليـل المجوني
يا حب ما بي منك أيّـة وصـالا = يكفيني من شوفك اكحـل عيـوني
واشوف عـزّك من كمال لكمالا = وافرح بسعدك في منيع الحصوني
قالـوا ندوّر غيرها قلت لا .. لا = باقي على حبّـي ليـوم المنوني
ترى الهـوى والحبّ دربه نكالا = يا جاهـلين فيـه لا تعــذلوني

[/poet]