سندويش .. من اي بوفية
نوض لمع واحسبه برقٍ من ( رفيّه )
برّاق نوضه سرى بي واجهر عيوني
ويوم ادهم الليل غدراء .. سقت رجلية
واقول جعل العواذل مايشوفوني
يالله تقاني من الوقت وبلاويّه
وتبيح طيشي وتغفر زلّة شطوني
ياعالم الغيب وانت اعلم بخافية
اعوذ بك من خفايا الغيب وظنوني
والوذ بك وانت ابو الذات الألهية
تكفيني من الردي الأحمق الدوني
يارب .. ياذا الجلال وعالم النيّة
جود برضاك ورضا شيبان ربوّني
على النقا والوفا ماهو على السيّة
يالله على برّهم زدني و كن عوني
ابطيت ساري وسجّت بي هقاوية
ولا ادري الاّ وبعض القوم وافوني
قلت العفو طرقيٍ والدرب طرقية
حاولت ابالحق بربعي غير فاتوني
سجيّت واثار دربي ماهي بذيّة
تايه وهالك ظما بالله تسقوني
وخلوني اوفى اصدقايه شبه عارية
والله لو اني ببسطة مايخلوني
والخبت موحش وهبّت بي شمالية
وخطاي مـ البرد مادري وين ساقوني
والله يقاكم من اللي سوته فيّه
دنيا الهبا مع ردي الحظ وجنوني
وباقي معي في القلص يالربع صفرية
هيّا قدعنا سوا وابليس ملعوني
اثارهم يحسبوني من (الحرامية -
الاربعين) أو (علاء الدين) ظنوّني
وانا نحيّة .. واثار القوم بنحيّة
هذاك قاطع طريق .. وذاك صهيوني
يبغوني ابيّح الخافي علانية
خبلان .. يبغوني ابيّح بمكنوني!!
كم ميّتٍ ماسلم في القبر من حيّة
وكم حيّ عايش وبين الناس مدفوني
للطيب في وجهي وللصدق مارية
عند الرجال الزحول اللي يعرفوني
قلت انهجوا حدّ تالي العلم بايدية
تبطون والله بدربي ماتباروني
وغبشت يوم الفجر بانت مواريّه
اقفيت اغنّي لبنت الشايب لحوني
لبيش ياشيطنة شعري وياغيّة
ياسلوتي كلّما احزاني تحدوني
لبيش ياحاضري واحلام ماضيّة
مرتعش بين الضلوع ومرقدش نوني
فديت والله عصابتش الجنوبية
سوالفش / لثغتش / ضحكتش وشجوني
شاعر عيونش سلومه مثل ماهيّة
حتى لو ان الليالي غيرت لوني
مسكون بالشعر واروّض قوافيّه
اعطاني الشعر ربي .. ماهو سكوني
ياخيّة اسرار كل العلم مقريّة
مايحتمل قول ( ودوني وردوّني )
في ذمّةالشام واهل الشام ياخيّة
ماني بـ (درزي) ولا جدّي بـ (ماروني)
انا مجرّد بشر تاهت خطاوية
كادح/ بسيط / العرق وسّم على ردوني
من فضل ربي قنوع بما قسم ليّه
وماعند ربّ العباد ابقى ومضموني
والاّ انت ياحاسدي حتى على الفيّة
انا برحمة بديع الخلق والكوني
ياخوي فارق كذا .. والله مافيّه
حيل اتحمّل طعون .. بلشت بطعوني
حي الكرامة / وعزّ النفس ياحيّة
حتى ولو عشت باقي العمر مغبوني
واصبح على سندويش من أي بوفيّة
وامسيّ وانا اعدّ بهمومي مع ديوني
المقرّ بما فية :
محمد الدحيمي