[نوف الثنيان]

فمان الله يا ماضيٍ كتب بين الضلوع سطور
فمان الله .. هي غربه معاك وغربه بدونك

خطاي إني تمثّلت الحلوم وقمت أشيد قصور
تمنيت الحضور اللي .. يوسّع صدر مجنونك

تدلت لك عناقيد المحبة وانت ْ أرضك بور
تشح امزونك بقطرة ندى.. يابخلها مزونك

وأنا اللي بس زلزلني.. تبيّن للخيانه دور
تذكّرت الجروح اللي غبنها باقي طعونك

تساوت جرحٍ وطعنه .. ويبقى وقتي المهدور
سهرت الليل يوم إنك تنام.. وترخي جفونك

فمان الله يا نبضٍ قضى به.. قلبي المخطور
سنين الهم والغربه .. وحزنٍ دار في كونك

فمان الجرح والصدّه.. فمان الخاطر المكسور
فمان أوقات .. لو مرّت معاك تمر من دونك