تحية كقلوبكم ...
إليكم هذا النص آملة أن يحوز على بعض الإستحسان ...
. ..ــــ
طرى في البال هوجاس ٍ شعور ٍ خِفـْت تفسيره
....................... شعور ٍ يوم لاقيتك نسى باله و هوجاسه
تقوله : " نفترق لازم عسى يا علـّها خيره "
....................... واقول إن كانها فرقا عساها ضِعْـف مقياسه
خبَرتك ما تقول إلا كلام ٍ دون تبريره
....................... علامه هالحكي كله لسانك يومها داسه ؟
سكنت الروح في روحي بنى لك خافقي ديره
....................... تطاول في مبانيها و لكن إنهدم ساسه
حسبت ان الفؤاد بْطلعتك بيطير مع طيره
....................... واثر طيري بجنـحانه غدى عباس فرناسه
كسَرت من الغلا قلبي بعد ما طاب تجبيره
....................... شربت من العطش دمعي بعد ما إمتلى كاسه
تصوّر هالعقل طيف السراب ْو زان تصويره
....................... ألا وش حيلته عقل ٍ ضـَرَب باخماسه اسداسه
يعانق هالألم روحي.. عـَرَف للطِـيْـب تقديره
....................... حـَلـَـف في داخلي هالجرح لا ما ينحني راسه
خطاي إني عطيت الودّ منهو ( لا ) حسن سيره
....................... مثيل الخـَـلّ.. في السكـَّر إلى من إختلط .. حاسه
حبيبي وش لنا والحب..دام الحب تصبيره !!
....................... بعيد الفرق مابين الفـَحَـم .. مابين ألماسه
حبيبي للأسف ماعاد قلبي ينتفض غـِـيره
....................... ترَيـَّح من جميع احساس قلب ٍ ميِّت احساسه
حبيبي والوداع الحل كانه ما بقى غيره
....................... أمانه بس لا تنسى تشيل الحب فأكياسه
طرى في البال هوجاس ٍ شعور ٍ ( صَحّ ) تفسيره
....................... شعور ٍ يومي اطريته .. رميت البال .. بأنجاسه
عبير بنت أحمد
القصيدة السابقة
ــــ.. .