من وحي المطروالغيم ...
..............................
تخيل
أنا وياك
بعيد هناك
بين لغيوم
نتراكض
نطيح... نقوم
نمارس طفولتنا
براءتنا
ما نعرف
أسى وهموم
تخيلني
مطر يهطل
يبلل كل لحظاتك
يبرد قلبك المحموم
تخيلني
سحابه م الفرح تحمل
كل احزانك المرت
حزن الراح
حزن بكره
وحزن اليوم
تخيلني
أنا غيمه
وتحضني
وارحل في مدى صدرك
نصير واحد
نصير اثنين
نتبعثر.. نصير اغيوم
تخيل..
غيم يتواعد
على الفرقا
يتقارب.. يتباعد
وتمطر هالسما أحزان
ويفز الكون باوجاعه
يتألم ... يصير مكلوم
.....................
تخليني
دفتر ... فِكر والوان
تحملني بعيد اهناك
ترسمني على الشباك
حمامه اجناحها مكسور
تداويني
وتفتح للهوى صدري
تفك أسري
واعبر في مداك ابحور
ارسمني
زجاجة عطر لك وحدك
تعطر لك خيالاتك
وتملا كل أحلامك
عطر لو فاح بايامك
يشبه ريحة البخور
ارسمني
على الجدران
فرس تصهل
ولا تسأل
كيف تقدر تروضني
لأني صرت لك مهره
وانت تكون فارسها
وحارسها
وتفتح قصرها المهجور
تخيلني
فوق الغيم
الك جنه.. وتسكني
وسط هالعتمه تدخلني
راح اكون الك شمعه
أو دمعه
فرح واحزان مجتمعه
راح اكون الك ظلمه
أو نجمه
على كيفك
راح اترس ... كل دنياك
فرحه ملونه بالنور
حبيبي .. يا بعد عمري
تخيلني .. أنا وياك
بعيد هناك
بين لغيوم
مثل طفلين نتراكض
نطيح .. نقوم
تخيلني
أنا عشك
وانت بعالمي عصفور
تدور الدنيا .. خل نفرح
ونرسمنا
أغاني بالهوى تصدح
غيوم .. امطار
نرسم حلمنا شباك
ونطلق حبنا نشوه
طيور تكسر
مساحات الألم والخوف
وتعبر في مداها بحور