[عياد الرشيدي]

على الله ياشبيه الغيمه اللي تعتزم ترحال
تجاذبها هبوبٍ لشمال وعين ترعاها
تخطا تنثر الدمعه ويسترها غطا وجلال
ومن حشمة بنات البدو مبداها ومنهاها
على الله حر هامتها وخصلتها عليها ظلال
على الله ياشموخٍ مايعرف الكبر مبداها
على الله مهرةٍ تلعب وصدرلا الريح له شيال
اصيله بنت اصيله من خماس الرجل لعلاها
تغنا الشعر فيها والشموخ شموخ روس جبال
تــباها كنها سحبٍ تعلت طيب منشـاها
دخيل الظي من بين الشفاه وخاطرٍ مختال
دخيل البسمه اللي تكسح الزعله على شفاها
دخيلٍ للعيون الناعسه مع رمشها الميال
دخيل الموق واهدابه ودمعه في محيــــاها
دخيل الكف والحنا دخيل مصافحٍ مطال
دخيل مصافق الكفين لاجتني من اقصاها
ابيك هنيه لاهنيا ابيك قريبٍ تنطال
ابيك ان جيت قدامي واذا ابعدت مرضاها
وانا ببقى عزيزٍ لازبنتي زابنه رجال
شموخي هو شموخي ماتثنى واردٍ مـــــاها
على الله ماعلى راسي سوى غتره عليها عقال
وابارد يابحور القاف واشرب مية احلاها
على الله ياسمي الغيمه اللي تعتزم ترحال
تجاذبها هبوبٍ لشـــــمال وعين ترعاها