[نواف الشمري]

سلااااااااام مربع للديوانيه ...

منذ مبطي ماكتبت موضوع هنا...

لكن دام اني فاضي....الظاهر اني راح اسردلكم سالفه من سولافاتي اللي اول.......




كاناول ايام عيد الاضحى المبارك طبعاً حالي حال خلق الله قمت الصبح من خلال مداعبة من رجل الوالد الله يطول بعمره ...
الله يهديه ابوي قومن من حلم في قمة الروعه يووووه جلسه رومنسيه مع مزنه في مطعم صيني وكنا نتكلم بهمس وناكل رغفان ويوم قومن الوالد بالطريقه المذكوره اعلاه لقيت نص القطن اللي بالمخده بفمي !!


غسلت وجهي واكثر ضني اني ماغسلته.. ونزلت اركض ورا الوالد للحوش علشان المذبحه اللي بتصير طبعاً بما ان الوالد هو رئيس العمليات والقائد الاعلى لنا في المجزره فقد اصدر تعليماته بتوزيع المهام على جميع افراد القوات العائليه ..

وكان نصيبي من المهام هو استدراج الخرفان الى ساحة المعركه او المجزرة وتنتهي مهامي بذلك .. بصراحه انبسطت لانه اسهل من انك تمسك مع الوالد لان الدعوة به اصابات ( ابوي نظره ضعيف شوي يعني عادي اذا طيرلك كم اصبع وانت ماسكله كراع المغدور فيه )
الزبده بديت استدرج الخرفان الى المنطقه المحدده واحداً تلو الاخر وجبت الاول شايله وجبت الثاني شايله اما الثالث بصراحه هو اللي جابن للوالد شايلن مع كراعيني ( شكله بطل جودو سابق )

المهم بدا ابوي في سفك الدماء
طبعاً نسيت اقولكم ان الوالد جايب قوات صديقه للمشاركه في المجزره ثلاثه بنقلادشيين ( يالله كتبته ) المهم مع اول خروف قتله الوالد
( بصراحه اعترف انه كانت غدره بالخروف لانه كان ماخذ الدعوة مزح ماكان متوقع انه ينذبح )
يوم ذبحه الوالد والله ويتطايحون الثلاثه بنقال واخوي معهم
لاحول ولاقوة الا بالله وش السوات ويالله نجيب هوز الماء الملاح حق الشجر وانواع الرش على وجيههم لين صحو طبعاً حصل لهم كم طراق لزوم التنبيه والافاقه ( ماركه مسجله ) .

.المهم صحو وكملو مهامهم تحت تهديدات الوالد بالقتل بدل الخرفان لكل من تسول له نفسه بالتقاعس عن اداء مهامه المنوطه به ( تتعبون ولاتجيبون مثل هالجمل الرنانه ) ..

بصراحه انا جبتلهم الخرفان مرتن وحده استدرجتهم كلهم علشان افتك من الشغله بصراحة كان ودي اتكشخ واروح اقزقز بالحارة وفعلاً جبتهم كلهم وفركت لغرفتي وتكشخت وطلعت من البيت وانا امر من عند بيت جيراننا الا هذا عبيص الداشر ..


سالته فاضي قال لا قاضي وانا ارمقه بنظره ( اعرف ارمق بعد مايمديكم علي ) ..

وانا ارمقه بنظرة حاده قلت تنكت معي انت !! انا اسئلك انت فاضي قال ايه توي قاضي من الذبح قلت زين معي نتسكع ونتطمن على احوال الحارة وهو يجي معي مشينا شوي وحنا مارين من عند بيت بالحارة الا عند باب القراش الكبير به قطوف كثرات لا كثيرين لا ااااا مانا كثرهن والله وحنا نتطلق عليهن ونتخانق وبعد مداولات ومشاورات اتفقنا على ان قطوف المالبورو الابيض لي والاحمر له


المهم قعدنا نتتن وضرب من القطوف تخبرون عاد وحده به مزه وحده يالله نص مزه ووحده ماتقدر تولعها مابه شي !!
واثناء ماحنا في عز الهدوء والانسجام والدخنه لمحت سواد ورا الباب لان فيه فتحات صغيره بالباب وانا على طول اطفي القطفه اللي معي وهو يرفع راسه عبيص الداشر ويصرخ علي حرررررام عليك به مزه ( دينه ودين الاسراف ) ..


قلتله لا خلاص انا بطلت التتن ( لاني حسيت ان اللي ورا الباب هي مزنه بنت الجيران وابي تسني عاقل عنده )
ناظرلي وقال اجل هات قطوفك

عطيته بقايا قطوفي وذكرياتي وامالي وقلبي يتقطع عليها ..
المهم انا صرت ثقل وعبيص الداشر مايدري وش السالفه والله وانا اقعد اتفلسف عليه تسي يعني عندي سالفه كله علشان مزنه وعيون مزنه ورموش مزنه
واقعد الغى عليه واتكلم رياضي مثل اللي سجل الاسبوع اللي فات بالجامعة بالرياض ورجع علينا وهو يلغى ويقول ذبه وفيذا وفي ذاك ومهن بهن ..( طبعا خالد الشايع هالحين ينقز علينا::وش بهم اهل الرياض؟؟؟...الا قل وش مابهم....ماعلينا)..

المهم جلست اخربط وانا اناظر اللي ورا الباب بطرف عيني كل شوي ..
وانواع التسكب وتوزيع الابتسامات ..
جلست فتره على هالموال مادرينا الا الباب يصبخ طخ طخ طرررخ !!!!
وانا على طول اقرب لخرم بالباب قلت مابدهاش البنت بايعتها خل اقزه واول ماحطيت عيني الا جارنا معه سكين وساطوره ويركض لجهت الباب اللي انا عنده
ويصرخ على عياله الدببه الواحد مايدخل مع باب خفجي ستي سنتر (اكبر من الراشد عندنا بالخفجي..تدلون سوق الرخوم؟؟ هو جنوب عنه)
ويقولهم واحد يلحقه من عند الباب
وواحد يحشره مع الشارع!!! واللي يجيبه لي حي ولا ميت له خمس طعش ريال ودسته صواريخ ..
وانا التفت لعبيص الداشر قلت مااابدهاش العمر ياشامان عرفو اننا نقزقز البنت حط رجلك

وانا امسك نعولي تكرمون كل وحده بيد واعض شليلي وازعج الصوت على عبيص قلت خلك على الميمنه وانا على الميسره والله ونمغط وعندك وعندك وعندك وانا التفت لورا االا ماورانا احد !!!

قلت ياعبيص ولو شكلهم يخططون لهجوم مباغت بس رح انت مع شارع وانا مع شارع وبكرى ان شاء الله نلتقي وفعلاً تفرقنا ورحت انا اراقب الوضع واشوف الاخبار

الا اكتشفت بعدين ان اللي كان ورا الباب كان خروف الضحيه ماهو مزنه !! وهو اللي كانو يلحقونه ماهو حنا !!
والله وانا استانس عقب هالخرعه واروح اتمشى بالحاره ادور عبيص اللي سمعت فيما بعد بقناة الجزيره انهم ماسكين واحد قاطعن الحدود بين ايران وافغانستان عاضن شليله ونعوله بيديه وبمخابيه متفجرات ( الله يذكره بالخير كانت معه دسته طرطعان ابو ديتس ) ..
ويوم طلعو صورته الا هذا عبيص الداشر عرفته من سيقانه
الله يذكره بالخير الظاهر انه من الخوف والخرعه عجز ياقف !!!
الله يذكره بالخير كان دلخ ونعم الدلخ...



الى لقاء اخر ..
مع داشر اخر..