[عبدالرحمن اليحيى]

انا دخلت مع الباب بعد ما شيبو اخواني و خواتي في بيت شعبيات الطيني و اصوت ولا احد يرد قلت وينهم مسيرين


وادخل المجلس الا ذاك الشايب اللي متسند على الجدار ومرتكي على جنبه الايسر وبيده عصا احسبه نايم وعيونه مفتحه اثاريه صاحي و امر من جنبه وهو يشر بعصاه ويصيح بصوت عالي شوي خلوها وانا ادقق في ملامح الشايب الا هو ابو نوت مخرف ويحسنه في ميدان المحاوره

واسلم عليه واقوله ويش لونك يابو نوت ؟؟؟؟ ويرد علي البيت سرا قلت يالله حسن الخاتمه.


واشوف ابو فارس في الزاويه الثانيه منسدح على فراشه و يبولع بريقه وكل شوي دالع لسانه مثل هذا>>> وياكل جماه وله صوت يا دوب تسمعه الا قربت من عنده واول ماسمعت صوته قلت مشاء الله على ابو فارس محسن الله خاتمته يسبح ويهلل مشاء الله عليه واقرب من عنده و اتسمع ولا الرجال ينوني ويغني عنود الصيد صاتني وانا من قبلها مانصاد!!!!!! واسلم عليه ابو فارس اربك بخير ويرد على بخير

قلتله ويش يقول يابو فارس

ان قلـت سولـف يسولـف لــي بتسبيـلـة"
"وان قـلـت بالله يـقـسـم لـــي بسلـهـامـة

وهو يجي ايبي يرفع راسه من المخده يبي يعلمني باقي القصيده ويعجز ويطيح راسه على المخده وهو يتنهد ذيك التنهيده اللي من قلب وهي تذرف دموعه وبغيت انا ابكي و قلت ارتح يبو فارس بكره ان شاء الله تعلمني باقي القصيده وهو يهز براسه واطلع من المجلس و العبره خانقتني


وادخل الصاله والا من اشوف دباااااااان جالس بوسط الصاله وفي يده اليسار حبل ويده اليمين فوق اذنه ويوم اقبلت عليه وهو يناظرني ويبحلق بعيونه وقال هي هي كمان بوي وير از يور هورس اثاري المسكين خرف ويحسب انه في تكساس كاو بوي وعلى هال الموال من يصبح الين يرقد وهو كل من مره صاح عليه هي هي كمان بوي وير از يور هورس قلت يالله حسن الخاتمه تذكر يوم انه يدرس في امريكا


والقا عبيصصص بجنبه يقلب في سيقانه واذا اخذ شوي قال ترا ماهنب لي فكوني منهن خرف وهو متعقد من ذا السيقان حسبي الله على اللي عقده في شبابه

وامر على ابو زرفيل والا معه ذاك المشعاب ومدد رجليه و يصيح اوووووووهي اوووووهي الحريش اووووووهي دغش ياراعي البل دغش ياسنايد والا خيال الخيل وانا ابو زرفيل والا هيجن

دل القلص دله لا يشربن المغاريبي

والا جرها ما انت هيجن اليا هيجنت والا انت عن فاطري حول

واذ مريت عليه قالك معك عمايدي يسنايدي خرف وهو يشرب التتن


وامر على ابو عيون والقاه على فراشه وراز ظهره عاد خبركم ما يحب احد يقوله انه شايب وماد يدينه وفارد اصابعه ودالع السانه يشر فيه على اصابعه و يعد ون تو ثري واذا وصل ثري ضيع ورجع يعد من جديد ون تو ثري على ذا الحال


ومر على غرفه الشباب امحق شباب و هذا عادل الضويان عنده رادو قديم مركى ابو موجات ضغط ومرتكي عليه و يهيجن على هدير البوصطه اثره خرف وهو ماسك مع فيروز



وامر على اخوي خالد العنقري والا الرجال واقف وحاط يديه بوسطه وكل ماخذ شوي صاح عاااااااااااااااادتن سر و الا صاح الى اليمييييييييين دور
يحسب انه الى هالحين في الميدان

وامر على البنات ابي اشوف ويش علومهن والى الحال من بعضه


وامر والا هاذي الجازي ماتقدر تمشي مغير تحبي وكل خمس عشر دقايق صاحت جوززززززووووني جوززززززووووووني واذا قالو لها ان شالله انتي توك شباب استانست شوي وخذت لها غطه و قامت جوززززززووووني وعلى هال الحال الله يرحم ضعفها


وامر على نوره والا معا ذاك الملاس وجالسه وكل شوي ويش تبون اطبخ لكم مرقوق والا جريش اثاري المسكينه خرفت وهي متعده من الطبخ

وامر على ليالي نجد والا هي ماسكه عقلها و ماسكه المبرك لا تحرك ولا شي ان جها احد سولفت عليه و الا رقدت


وجيتك منهم وهم على ذا الحال

العتب مرفوع والزعل ممنوع