[كش ملك]

الليل موحش .. غريب .. وحيةٍ رقطا .. وديجـور
والليل طيب .. ودفا .. واخت تمازحني .. ونوّار

ساعات احـس ان هذا الليل : نبش عـظام وقبـور
وساعات احسّه : فرح بنت برسالة حب واسرار!

كم ليلة كان فيها الليل : عبد .. رطب .. محفـور !!
وكم لـيلة كان فيها اللـيل : ((جيفارا )) وثـوار !!


يا ما تكدس .. وهو يشـتم (( عيال الكلـب )) مخمـور
وياما ( تسندس ) وفاح اللون الأخضر وأربـك الدار !!

له ألف مليون صيغـه .. في يديـه النار والنـور
وهو شيئ ثالث .. بعيد عن انفلات النور والنار

يا ليلة .. ليلها زرنيخ منـفـي يابـــس .. بــــور
لي ليلة كان حضن أم .. وثـلاثة أيتام وصغـار !!

ليل اتـشــمشـم به اللـي مر ..نـكهـة خـبز تــنّور
وليل اتجـشم به اهوالي لحالي .. واصبح كثار !!

انا اصـدق الناس .. واعدلـهم .. وانا البهـتان والـزور !
يا قطعة النّرد .. شوفي وش بقى لي .. بي .. من اعذار !!

في داخلي قـصـة غـياب غريـب يـشعل حضـور
هذا اليباس بعروقي .. يلعن ام الوقت .. لا ..جار

غاب الطفل ، قلت طيّب .. غاب بعد الطفل عصفور !
طيّب .. وغاب الثمر .. طيّب .. وغابت كل الأشجار!

غابوا محبين .. طيّب .. غبت أنا طيّب .. بكت دور
طيّب وبعدين يا طيّب ؟! .. وش اللي ظل ما صار ؟!!


تبسمت لي مرة .. قالت تعال .. وطاش بلّلور
بالحكمة اللي تضاحكنا عليها دمع وغبار :

ما دام دنـيا .. وترفعـها قـرون السـيّد الـثـور
وش يزعل العاقل ان نادى عليه حمار : يا حمار ؟!!!


فـــهــد عافـــت