|
من حقنا نمزح مع بعض ولا لا ؟؟
نحن والمزاح
خلونا أول شيء نعرف وشهو المزح:
المزح الله يسلمكم هو أنك تطيب خاطر اللي حولك وتدخل عليهم السرور بالملاطفة والميانة، وهذا ما فيه شيء مستحب ولا عليه خلاف كما أستدل البخاري في باب الإنبساط وذلك بحديث النبي عليه الصلاة والسلام (يا أبا عمير ما فعل النغير) وكذلك أنه عليه الصلاة والسلام كان يقول لأنس ( ياذا الأذنين)، كما أن هناك الكثير من الأحاديث التي تدل على ذلك.
لكنا يوم أنا فضينا وكثرة روحاتنا وجياتنا وكثرة تجمعاتنا الفاضية مع خويانا وأخوانا بالإنترنت وبالشارع ... ما عاد صار فيه حدّ للمزح اللي بينا ... وصار لا قدّر الله يقلب المزح إلى مطاقة وكره بينا وبين بعضنا (الله لا يجيبه).
وأنا أأكد لكم أنا لو عرفنا حدود المزح زين كان ما وصلنا للمواصيل الشينة والنتائج الماصخة، وبالنسبة لحدود المزح فأنا أبسردها لكم حسب معرفتي وإطلاعي وهي:
- في المزح وأنا أخوكم لا تقربون الدين ... كل شيء يمزح به إلا الدين.
- أمزحوا الله يسلمكم ولاكن بدون تخويف الناس بالسلطة اللي تملكونها أو التهويز بالسلاح أو أي شيء يسبب الخوف والخطر على اللي أنت مازحٍ معه.
- وش فيها إذا مزحتوا وأنتم صادقين ... ترى الكذب حبله قصيّر ... وإذا أكتشف خاب كذابه.
- لا يصيّر مزحكم ذبٍ على الناس الثانية ... ولا غيبةٍ فيهم.
- لا تخلون المزح على ناسٍ الله عيبهم أو نقصهم بإرادته عنكم ... فخلق الله دائماً حسن. والله يهب ويمنع سبحانه. وتذكروا أن الله يمهل ولا يهمل.
- لا تخلون عاد المزح حلى ... كل من قام وقعد ... راح يمزح (كثرة الشيء تمصخه).
- تعرّف أول على اللي أنت تمزح معه ... اللي ما تمون عليه خلّه .. لا يقلب عليك.
- لا تصير مزّاح ... تعلم متى تمزح ووشلون تمزح ... مهب مثلاً في العزاء تمزح.
- بعض المزح زين ويجب فايدة، إذا عرفت تسيّره صح ... وبعضه اللهم يا كافي ما يجيك منه إلا المشاكل اللي ما تنحل.
.
.
.
.
.
.
هذا ما قدّرني الله عليه اليوم ... وعساكم دائماً بفرح وسعادة ... بدون مزح زيادة.
هالمرة ما فيه حارس الديوانية ... علشان ما أمزح معكم ... بس هالحين.
حمـــــــــــادة الحــــــــــــــلو
|