ملف / الشاعر / الاكلبي
( 1 )
( بلا كهرب ولا بيجر ولا غازٍ ولا نقّال )
الا يالله عفـوك لا معي بيـجــر ولا جــــوال ****** ولا عنـدي وضيـفه والتجـــاره فاشـلٍ فيـها
ولاعندي شهـاداتٍ ولاحــرفه تسـد الحــال ****** ولا حــظٍ كبير لا اخـطـت الجــــره يقديها
مخابي الثوب تومي مادخلها من زمان ريال ****** بها فاتورة الكهــرب ولا يمـديني اقضيـها
علىذيك العراوي تتعب الحادي مع الجمّال ****** ثلاث اشهـور فالورشـه وشهـرينٍ مغطيـها
ابيها لو تجـمّـل يـوم واجلـبـها على الدلاّل ****** يجيـها واحـدٍ حـظه مثل حـظي ويشــريها
نصيت العسـكـريّه يوم قالوا للنظـام رجــال ****** وقـدّمـت المـلـف وصـورةٍ متشــخـصٍ فيـها
خـذا الاوراق مني واحـدٍ مـا عند ابـوه دلال ****** سلوم الناس واهل المعرفه والطيب مخطيها
قراهـا في دقيـقه والتفـت عـجـلٍ علي وقـال ****** شهادتك العظيمه يا ولد وين انت مخفـيها
هزّيت الراس ماعندي تقول اني من البنقال ****** وقمـت احـب خشـمه واطلبـه بالله تمشّـيها
حـذفها من يده شين الطبيـعه والنبا والفـال ****** وقـال ازين تعـوّد صـوب نوقاتـك تعشّـيها
تناوشته من الكرسي وعفت الحل والترحال ****** وضربته بالبياله عقب ما بيّحت شـاهـيها
خذوني للسجـن لا نيب لا ظـالم ولا محـتال ****** مجـرّد واحـدٍ جـا يكـحل عيونه فيعمـيها
ويوم اني خرجت اقفيت لارض الله وسيع الجال ****** عـلى بـرٍ هـواه يـداوي العـلّـه ويـبـريـهـا
ادوّر قصعة الجـربوع والظـب الفتي يخـتال ****** والارنب يا شفاة الروح ما احلاها وطاريها
بـلا كهــرب ولا بيجــر ولا غـازٍ ولا نقّــال ****** قوانين الحضــاره لا تبي شـوفي ولا ابيـها
الشاعر /الاكلبي
--------------------
-
-
-
( 2 )
( الـدنـيــــا )
جلست البارحه لين انتهى ليلي وانا سـهران ****** افكــر في زماني وش خـذا مني وش اعطـــاني
افكر في الحـــياه الي تباهت واشغلت الانسـان ****** عن الدار الاخـيره والهته عن عمــــره الثاني
عن الدنيا خذتنا واشغلتنا عن رضا الرحـمـــن ****** وخلّـت من تبعها في النهـــايه خـاســرٍ فاني
كثر فينا الحسد والخير قفّا واقفرت الاوطــان ****** وصــار الشيخ قبل الشـاب طمـــاعٍ وقومــاني
تخلينا عن العــادات واصـبحــنا بـلا عــنوان ****** نسـينا الي مضى واصـبح لنا التقلـيد عــنواني
تغــيّر وقتـنا عـز الله انـك يـازمـن خـــــوّان ****** تقـلّـب كـل يــومٍ حـــــال والله مـالك امــاني
قديم الوقت كان الذكر لاهل الجود والشجـعان ****** ولاهـل المعـرفه والطيب واهل الشور والشاني
الا منه ذكــر للـنـاس جــاه من الثـنا مــا زان ****** يقـال ونعم له ذاك الرجـل قد كــان ثم كـاني
ماهـوب اليوم كل انســان له عند المـلا مـيزان ****** ومـيزانـه رصيـده فـالبنـوك ان كـان ملـيـاني
ولا احـدِ ينشـده من وين جـــاك المال يا فنان ****** حــرامٍ في حـــرام وصرت به ياشين سلطــاني
الا منه دخـــل في مجلــسٍ فيه الردى ملـيـان ****** نفــخ صدره نسى ربه تكــبر صار شـيطــاني
يفز اله الحضــور وكنهم حوله حرس هــامان ****** وكلٍ يمدحه منهم عسى يحظى بالاحســـاني
ومثله صـاحبٍ سمسار يغشك باعذب الالحـان ****** كـلامه حــالي مثل العســل والقلـب بركــاني
اذا له حـاجـةٍ عندك يحطـــك للبلـد سلــطـان ****** ويبـدي لك محـبه مالـها فـالكـــون مـيـزاني
خــويك فالرخى وان ضـاقت الدنيا عليك يبان ****** يهـدك لا انقطع حيلك يبيعك بارخص اثماني
تجنب صحبة الخاين ولا ياخذك فيه احســان ****** خـوي المصـلــحه مـاله ســوى ذلٍ وحـقـراني
وثالثهم جليس الســـو سمـوه العـرب شيطـان ****** تحلّى في صفات ابلـيـس قـاصيـها مـع الـداني
عذابه لا لقاك بخـير شبت جـــــوفه النـيران ****** يبي يبعـدك عن درب الطــهــاره والـتـديـاني
يزيـن لك دروب الـشـــر ويفـتــّح لهـا بيـبان ****** يقــول انت العظـيم ومنزلتك اعلى من فـلااني
يجي لك من طريق المال والنشوه مع السلـــوان ****** وتبدا ما دريت ان الـطــريق اقصــاه نـيـراني
ولا منك وقعت اقفى وهــو متشمت ٍ فرحـــان ****** قدر يغــويك واقفى عقب ما شـافـك بالاكفاني
وابو وجهـين يا ويله نهــارٍ ترجـف الابـدان ****** يعـذب في جهــنم ينكـــوي بالـنـار ويعــاني
يغش الناس في شكله تقـول انه من الرهـــبان ****** خـدع من صدقه ما يـدري ان الشــيخ ثعــباني
اذا جــــــا بين ناسٍ يعــبدون الواحــد المنان ******تظــاهر بالخشـــوع وهل دمعه فوق الاوجاني
والا منه خـلا بالـنـفــس قام يطــمّر الحــدان ****** سـعى في كـل شيٍ يغـضـب الـوالي بكــتـمـاني
تراشى وارتشى ما خـاف من ربي عظيم الشان ****** كـلا مـال اليتـيم وبالربى تاجــر وكـســباني
وباع المنكرات الي تحــــط المجـتـمـع مرضان ****** جنى مالٍ حـــــرام وذوقه لاهـله وهــو عاني
الا ياســـامـعٍ قولي تر الدنيا لهــا وجـهــــان ****** لها وجـهٍ حلو والوجه الاخـــــر فيه نيباني
وفيها الامتحان الصعب وابطــاله هـل الايمان ****** لهم فيهـا شـهــاداتٍ الى الجــنه وغـفـــراني
لأن المومن الصــالح اذا جــــته المصـــايب بان ****** دعـا ربه وزاد الصــبر في قلـبه والا يمــــاني
واذا جـاه النعــيم يقـابله بالشكــر والعــرفان ****** يزكي المـال ويعين الضعيف ويكـــرم العــاني
تذكر يا بن آدم واعرف ان فـ الاخـــــره ديّان ****** غـفــــورٍ للذنـوب ولا تغــرّه زلة الجـــــاني
وقدامك سـبيل الرشــد والا الكــفر والعصـيان ****** ولك عينين في راســك ولك عقــلٍ ووجـــداني
الا يـارب تهــدينا وتغــــفـر زلـة النســـيان ****** وتـدخـلـنـا نهــار الـدين في جــنات عـدناني
وصـلى الله على محمـد نبي الـحــق والبرهـان ****** رســول العـالمين اجمع ودينه خــير الادياني
الشاعر /الاكلبي
--------------------
-
-
-
( 3 )
( يوم غلّق الاشتراك !! واقعيّه )
عـزتي لـلـي تعــطـل وقــرّب للهــــلاك ***** في خلاً خالي به الذيب الاسحم له نخير
واقبلت صوبه مزون السـما فيها احتراك ***** في ظــلامٍ حـالكٍ والمـطــر جـا له خــرير
مثل حـال الاكلـبي يوم غلّـق الاشــتراك ***** واســتلم فـاتـورةٍ ما يقـوم ابها البعــير
راح للهــاتف يبي من يفــك الاشـــتباك ***** وكـلـم المـامــور قال اتجـه صوب المـدير
راح للمكـتب وهـو فيه رجــه وارتبــاك ***** عــادة المـديـون لا شــاف ديّـانه يـذيـر
يوم شافه قـال يـا راعي البـل وش وراك ***** كــل يـومٍ بالفــواتير جـايٍ لـك صـريـر
يـا بـدو خلـيتو الـنت هـوشـه واعـتراك ***** تحسـبون النت كبسـه وصحـنٍ مسـتدير
قال له سكّــر فمـك لا اتوطّـا في حـشـاك ***** انت واشكالك على المجتمع شرٍ شــرير
تحسب انها ورث جــدك وعمّانك واباك ***** انت مثلك ما يخلاّ على الحــدبا يسـير
الشهـــامـه والكـــرامه مخـلّيها قفــاك ***** فاطـرٍ تســـرح وتمـسي تدوّر للشـعــير
البـدو يســـرون يوم انت قـابع في دفـاك ***** ما تبي فرقـا الحـليله ولا فـرقا السـرير
همهم جمع المراجــل وهمــك في عشــاك ***** لو تقــاعــد قمـت تبكي مثل ورعٍ صغير
كـل مـا جينـا نبي عـازةٍ تاخــذ عصــاك ***** شـايفٍ عمـرك علينا عسى حبلك قصـير
شـركـة لا جيت في لازمٍ تبحـث خفــاك ***** اجتمـع فيها المنـافـق ومعــدوم الضمـير
وقـفــو مـن دون مـن لا تــراه ولا يــراك ***** غـيـر عـنـده للرجـاجــيل تقـديرٍ كبير
ما نعمْ الناس والطيِب يِعــرف من هناك ***** والـردي يـاتـيـه يـومٍ عبـوسٍ قمطـرير
الشاعر /الاكلبي
--------------------
-
-
-
( 4 )
( هل تبحث عن وضيفه...؟ )
البــارحــه يـوم كـلٍ راح لفـــــراشـه ****** عيّنت هـــم الوضـيفه مـاخـــذ فـراشي
الناس في حـالهـا تمـشـي ومعـــتاشـه ****** وانا على ذمـة التحـقــيق منحـــــاشي
اهـل الوضــايف صــلاة الصبـح غبّاشه ****** وانا على مرقـــدي كني بالانعـــــاشي
كلٍ تجوّز واخـــذ له يا عــرب بـاشـه ****** واصـبح مع الناس مبســـوطٍ ومعـتاشي
شــريت لي غـترة بيـضـا ودشـــداشـه ****** واقبلت صـوب المكـاتب كني الشـــاشي
قـال المـوضـف ملفــك وســطه اقـراشه ****** كســــرة تمـيسٍ علـيها الذر يهـتاشي
صديت مـابـي ســـواليـفه وفرفــاشــه ****** مـانيـب في حــــال مــزّاحٍ وفـرفـــاشي
لو شـغّلو لي مسلسل خــــاله قمــاشـه ****** والا ثلاثين حلـقـة طــاش مـا طـــاشي
القلـب كـنه يحـــرّك فيه خـــــرّاشــه ****** والكـــبد كـنه ينقـشّـهـا بمـنـقــــــــاشي
قلت ابك عطني دقاق الهرج واجراشه ****** ابي كــــلامٍ يبـرّد لاهـب الجــــــاشي
قال انت مافيه امل تصبح فتىالشـاشه ****** ولا شـــريطي تبيع وتشـــتري كــاشي
وشـهادتك حطــها الديـوان بخــياشه ****** طـافت عليهــا السـنين ونسبتك مــــاشي
والا عيـونك تقـول عـيـون خـــفـاشـه ****** وحده تكبّس والاخرى تضرب فــــــلاشي
وان قمت تمشي يجـي رجليك رعّاشه ****** كنك تشوّت كـوور في وسـط الاحـــواشي
احسن لك تروح سـوق البدو وعشـاشه ****** تبســط على فصــفصٍ وتبيع فشـــفـاشي
عـودت مـا عـاد ابـي سـمه وطـــرّاشه ****** الله ولا حــــاجــةٍ تجـــبـرك بـاللاشي
اليوم الانســــان تقـديره حسـب كـاشه ****** لو كـان مـــالـه منـســــيه الـتـــرواشي
حـــوايجــه تنقـضى وتجــيه برمـاشه ****** لو ان مـخــــه معــبا تبن وخـــــيــاشي
لكـن قـالـو لـهــا دنيـا وغـشـــــاشـــه ****** واقـول انا كـــل نفــسٍ رزقهــا مـــاشي
الشاعر /الاكلبي
--------------------
-
-
-
مع تحيات نادره
-
-
|