|
يعين الله يادنيا تسـوق ايّامهـا الأحــزان
..................................... يعين الله .. وانتي مثل قفـل ٍ ضـاع مفتاحه
يعين الله ... وجروحي لها في كلّ وقتٍ شـان
..................................... كذوب اللي يقول ان الزمن بيـداوي جراحه
سقى الله يوم انا يمـّه غرير ٍ يزعج الجيران
..................................... سقى الله يوم انا طفلٍ يصج البيت بصياحه
سقى الله يوم كان اقصى طموحي .. لعبة الدنان
..................................... نهاية يومي المغرب ... واخاف الليل واشباحه
سقى الله يوم انا البس بشت ابوي وثوبه القيطان
..................................... واقلد كلّ شيٍ فيه .. حكيه .. جدّه .. مزاحه
واشيل المسبحه مثله ليا هوجس وهو سرحان
..................................... بيشعر ...واحسب ان اللي عطاه الشعر مسباحه
سقى الله بيتـنا ذاك البسيط مشقق الجدران
..................................... شجـاع ٍ يهزم الغدراء … بقنديله ومصباحه
تكحِّلنا القناعه .. لا طمع .. لا هم .. لا حرمـان
..................................... واذا جاء الليل تكفينا ... ثلاث اخوان .. طرّاحه
جميع الذكريات اللي غدت في قفرة النسـيان
..................................... يحـاكي حلوها عبره ... بموق العين سبّاحه
خذتني غربـةٍ عنوانها ... غربه بلا عنوان
..................................... ابي عقب التعب راحه ... لقى فيني التعب راحه
رجعت اليوم مثل اللي رجع عقب القنص خسران
..................................... غدا طيره وجاء يسحب سلـوقيه وملواحـه
قصيده مابَعَد مرّت ببال مسـاعد وضيـدان
..................................... هواجـيس ابدويٍ هايـم ٍ في عشق فـلاحه
وروح ٍ تايبـه كانت تبي لذنوبـها غفـران
..................................... خطـاي انّي كتمت اسرارها بعيـون بواحه
تقولين المطر ماهـوب … يمّـه دايمٍ هتان
..................................... اجل معذور قلبٍ في همومه ضاعت افراحه
انا يمـّه غلطت ولاني اول واحـدٍ غلطان
..................................... ابونا آدم من الجنه خرج باسباب ... تفاحه
خذلك الوقت فيني .. ماخذلتك ياأعـز انسان
..................................... وش الدبره ؟ وحظي صار.. قفل ٍ ضاع مفتاحه
الله الله الله الله الله الله الله الله
اقسم بالله انها اجمل ما قرأت منذ فترة ليست بالبسيطه.......
والله اني قريتها من اكثر من شهر وعجزت انساها......بالعكس الا حفظت ابيات منها من اول مره اقراها.......
والله ما ابالغ اذا قلت انك سيد الشعر وملك القصيد......
صدقني ان قصيدتك هذي هي سبب تسجيلي هنا اخوي الغالي
كل ما اقراها تدقني العبره.........ويقشعر جلدي.....
وارجع اقراها ثانيه وثالثه ورابعه.......لدرجة اني حفظتها عن ظهر قلب
شاعرنا الكبير محمد الدحيمي.....والله ان غربتك هي اروع ما قرأت في الفترة الماضيه
ولو قلت فيك ما قلت لن اوفيك حقك
لذا الاحسن لي ان اصمت
تحياتي لك
|