مانشيت
كل عام وانتم بخير .كان من الحنين مايكفي للعودة لكم
صدري ورق واحداث ليام مانشيت:
يثير قراء الصدور الوساعي
مرورهم كنه مع شرفة البيت:
ومصافح ايديهم يزيد ارتفاعي
مال الرسايل حظ عندي لوابطيت:
عن عالم التواصل الاجتماعي
املاوريدي واسكبه للمسا زيت:
لين السهر ياتي على اخر متاعي
ولين بكرة تمتلي الصحف كبريت:
من قصر عيدانه ومن طول باعي
فكري صخب حفله واهازيج واوبريت:
واول ضيا واخر مسافة شعاعي
يشرق تمرد والسما ذايعة صيت:
مهما غزاها كل نجم اصطناعي
يبقى سهيل آيه وقبلة وتوقيت:
يشهد عليه مجدفين السواعي
واظل انا مثل المطر حيثما جيت:
امر برض العيس وارض السباعي
لوكل الارض الماس والا قرانيت:
ماكان شفنا في ربى العشب راعي
شاعر لو ان ماهوب ادب ماتسميت:
لو قولي احياناً يخالف طباعي
لو صح من يتهم كفوف العفاريت:
ماسلت حوى عن سبايب ضياعي
مدري الظما ما تحتمله التناهيت:
والا خوى راسي مسبب صداعي
هاجوسي اليا مدها لي تقهويت
لو لم توافق لهفتي وامتناعي
ان سج هامت بي وساع الختاخيت:
وان رد يدعيني للأحلام داعي
واليا صحى تعصف بالافكار تشتيت:
واليا انصمخ لابو الذي تم واعي
ياقاري اترك ماتبي واخذ ماشيت:
عن قلة حضوري وكثر انقطاعي
ماقول تلقاني على ماتمنيت:
اقول في الكتّاب مثل الافاعي
وان قيل ياضيق المقابر على الميت:
اقول ماعد للحياة اتساعي
مبغا مية شاعر ولابغى مية بيت:
ابغى الشعر يحدث حراك اجتماعي
|