[ناصر آل مداوي]

الغالي اللي ترك غاليه ودياره=الله مع خافقي بعده وياصبره
ألجمني الوقت عقبه باعسر اقداره=ولا عاد لي في الحكي صوتٍ ولا نبرة
والجاش كنّ البلاوي تسبر اغواره=واكذب على خاطري واقول تختبره
وهْي الحقيقة تشقّ الثوب وستاره=ماكنّها الا الشباري والحشا هبرة
عليه عظمي كسير وزادت اخطاره=وكسور الاعداء والعذال منجبرة
روّح وخلّى المداين في النظر حارة=صارت بعدْه الوساع اضيق من الإبرة
والحزن في مهجتي بانٍ له عمارة=والفرْح من بعد مدّاته قصر شبره
والضيم في الراس والاطراف له غارة=من كثر ما شنّ غاراته كسب خبرة
مازال باقصى الحنايا زود مقداره=ومْحبّته في ثرى الاعيان منقبرة
مالي بغيره ولا امشي غير مشواره=عفت النصايح ولاخذ من حدٍ عبرة
ابغيه لو هو يمدّ الكاس بيساره=عندي يساره يمين وكسرته جبرة
هذا ونفسه بفعل الطيب أمّارة=محشوم من ظلمة الافعال والغبرة
لا شك ماله حليّ وصعب تكراره=عالي لو انّه تحَت.. متواضع بكبرة
احلى من الصبح في صغرتْه وانواره=واجمل من الروض وازهاره على كبره
كار الجمال الحقيقي دايماً كاره=جسرٍ وصول السعادة دايماً عبره
مشتاق له شوق غصن البان لامطاره=أو شوق مسحور للحلتيت والصبرة
مرت سنينٍ وانا عايش بتذكاره=احضن طيوفه واكحّل عيني بحبره
يا هيه ياللي تجيكم غابي اخباره=تكفون من موق عينٍ يذرف العبرة
ودّي بلقياه واقضي العمر بجواره=ما عاد لي عيشةٍ دونه ولا دبرة
فان كان حيٍّ فدلّوني على داره=وان كان ميّت فدلّوني على قبره