السلام عليكم ورحمة الله وبركاته
في البداية كل عام وانتم بخير وعيدكم مبارك
وكلمات بعد غياب علها أن تشفع ذلك الغياب
.
.
.
اشتاق لبلادي وانا في يديها=وشلون لا غربت عنها وشرقت
يمكن تسيل دموع عيني عليها=يوم الاكيد اني من اعماقي اشتقت
غارب ليا صار الحزن مرتديها=وان حطت الاحزان ملبوسها اشرقت
متساقط الاوراق لحدٍ يبيها:=بالحيف.. وليا عوّد ادراجه اورقت
اضيق لو في الحلم باسٍ يجيها=في الحلم هي بالذات معذور لا ضقت
عهدين لا فديها ولا فدي ذويها=وللعهد جعل الله يعاقبني ان بقت
بالجل ماهو بالقليل افتديها=والله لو تامر على الراس دنقت
احبها والحب منها واليها=غرامها بحرٍ غزيرٍ به غْرقت
مالي عقل يبغى النجاة ويعيها=الضيق بي وان مت في بحرها رقت
واثمل بها واغفي بها كل ابيها=وانا اشهد ان عذري قبيحٍ ليا فقت
وان تقتها وآنا على منكبيها=عذري كبر عزّان وطويق لا تقت
يا كم شكيت وسقمها محتويها=ياكم على رجوى شفاها تصدقت
ديرة هل العوجا عسى الله ايحميها=من شر اعاديها ومن ظلمة الوقت
ومدحور من قال ونوى السوّ فيها=دارٍ تقهوى الودّ.. وتعقّب المقت