يااللي تبا في عرش قومك تتكي
في رِجم عزٍ للخلايق مطلِّي
وتقول كلّ الطيب ملكي بصكٍّي
واصبحت بين الخلق دوم امتعلِّي
لاتحسب إنّ المرجلة بالتحكِّي
في عيب غيرك وانت عيبك يجلِّي
تقول عيب الشخص ذا مايزكِّي
وانت بحياتك للأسف ماتصلِّي !؟
لاتصير مثل اللي لخلّه يذكّي
وبجنازته يصرخ من اغتال خلِّي
لاكنت لأوضاعك وحالك موكِّي
لابد من أفعالك عنّك تهلِّي
بكره تدور الدايره .. للتشكِّي
وتكشف فعولك كل قولٍ مظلِّي
كم شخص عقب العز حاله يبكِّي
محدن يقول إنّ السعادة محلِّي