السلام عليكم ورحمة الله
اطيب التحايا لمن هنا ولمن مر من هنا
كل الامنيات ان يكون المستظلون هنا بخير
طاح الظلام ورافقه عازف الناي
واشتب عود وطاح رمح وقبيله
عشان اقول الحق يا فاقد رضاي
اصبحت لعيون الجروح الدليله
تدحرجت قدام عيني نواياي
واخذت سيف وصحت فوق الاصيله
من منطلق بادل من يبادلك راي
ما جاك حِيله منك بيروح حِيله
لو بعترف لك يا الليالي وش اخطاي
كان استرحت وصرت حاجه جميله
يوم اني اكتب باسم واحد من اسماي
كانت لغايه وبررت لي وسيله
ما دار في بالي ولا كان فــــ اجواي
غير الطموح وحاجةٍ مستحيلة
بانت ملامح رغبتي في محياي
خطوة وتقصر كل رحلة طويله
بديت ارتبني واعدد وش اشياي
وقررت اغامر لاجل حاجه نبيله
رميت في وجه السواليف مركاي
وكشفت صدري لكل نسمه عليله
على كثر ما الشعر مالي لي ارجاي
الا اني اكثر شخص ما يشتكي له
احاول ابعد عنه وازيد في إقفاي
واقفي وكني متجه واعدي له
نبضه وحرفه مسكنه في زواياي
وعقلي وقلبي مثل اخوه وزميله
اصد واضعف وانهمرله من اعلاي
وينبت على راســـــــــه زهور وجديله
اخوكم
واصل الثامر الدعجاني
.