[غارم العمري]

ياا ذا الفكره !
مدري ليه ؟ لاجيت اكتب لاجل اليوم
ولا بكره ,
قلمي يدب عروق الماظي !
يعمل قاضي ..
ويوقع في كل اوراقي / بالطفوله ,,
من الجلده لين الجلده .
يمشيني يوم كنت صغير ,
ويحوًس دايم بأغراضي ..
يكتفني بلعبي واصحابي
وضحكي واحبابي واقرابي ..
ونوح البير ,,
والوادي , والجو الهادي
وبلده ماهي بأية بلده !
مرسومه بالماء والطير..
يحكي نبعي .
ينزعني من بين احضاني ..
من ادناني لين اقصاني
ياخذني بيده ويسير .,.
ويجمع ربعي ,
وانا اقول الدنيا بخير ,,
يزرعني وسط الطابور
ومديري , واشراق الدنيا , وشكلي ,
والطلاب : حضور,,
والسبوره / والطبشوره / واجمل اهدافي بالكوره .
واطهر صباحات النور .
والاقلام مع الكراسه ,
وتشويشي في جو الحصه
وتشويهي في وجه الماسه ..
وصوتي في يوم الاذاعه
وخوفي من صوت المدرس
لدرجة قلنا للفراش : سمع وطاعه ,,
يا ويلاااه ,,
راحت وتشعبت كثير !
يالله !
قلمي يتمدد في دمعي ,,
كنه يتحكم باعياني
قلمي رجعي
قلمي رجعي
يقطع ذا الوقت العلماني ,
وااسف جدا ع التاخير ..