طاب اللقا عقب البطا والهنا طاب
من عقب طول البعد ياسيد الاحباب
لاياهوى بـــــــالي ويا كل الاصحاب
لامانسيت الــــود ياناعم القــــــــدّ
من عقب فرقاكم طوى حالي الياس
والروح عطشى والمعاليق يبّاس
ومايملا عيني غير زولك من الناس
إرحم رحمك الله ترى الحال منهدّ
هواك والقمرا وليلك بكانا
ومحدٍ رثاه الحب حيٍ سوانا
حنا شربنا الحب صرف وروانا
وسليت بالهجران سيف مهندّ
مذبوح في قربك وفي البعد مذبوح
وعمرٍ بلاكم مالنا فيه مصلوح
دِبَّ الزمن مبيوح يازين مبيوح
لانيب محتالك ولانيب لك ندّ
طيفك يجيني مرة في صلاتي
ومرٍ يـجـيـني زايرٍ في مباتي
أخلفتني واخلفت مجرى حياتي
عَــوّد علينا يااريـش العين عــوّد
وجـــهٍ طفولي بالــــبرآءه فـتـني
غنيت لجْــله لــحْـن من كل فني
يانابي الردفين ماخــاب ظــني
ياعود مياس ٍ ويا موضيَ الخدّ
فـتّـقـت قلبي يااريش العين تـفّـتـيق
ومماجـــــــرالي عفت كل المخاليق
وازعلت ربعي والرجال المطاليق
وجازيت بالهجران واركيت بالصدّ
أبكي على مافات يوم الصبا ذاك
وابكي على ذكرآه وابكي لفرقاك
واطيب ليالي العمر يازين وياك
حبٍ نزيه وكل يــــــوم يتجددّ
واليوم جيتي عقب ذاك البعادي
لايا هــلا يامرحبا يافوآدي
نار لشوفك تـتّـقـد بزديادي
وحِجـْـرَ المدامع عقبكم صار مسـّــود
يامرحبا عد المطر كلما هلّ
وعداد قفر ٍمجدب وصابه الطلّ
هلا هلا ياراهي الزين والدلّ
طاب اللقا عقب البطا والهنا رد ّ
عبدالله آل شداد
10\12\1431 هـــــ