احيان اهني صاحب المال بالمال = واحيان اهني صاحب الفقر فقره
واحيان اكشخ والبس شماغ وعقال = واحيان اسير ولا على الراس غتره
فيا ابن ادم المهموم يا طيب الفال = خذ لك من ايامك وانا خوك عبره
لان اختلاف الحال من حال لي حال = يعطيك فالدنيا مع الناس خبره
كم عاش فالدنيا فقير ومن ال = ما فاد غير ونعم حتى بقبره
وكم ولد لاش عاش في بارد ضلال = ما فاد شي ومات زوله وذكره
والوقت نفسه ما تغير ولا زال = يوم وسنه والشهر هو نفس شهره
بس البلاء بعقولنا صابها هبال = نركض بهالدنيا على غير دبره
بعنا الصبر من شان تحقيق الامال = واثر الامل مربوط في طول صبره
ومجملات الهرج قالنا وذا قال = في رجل ما يسوى لتعظيم قدره
ما كل منهو يلبس البشت رجال = يبرك ويشتال الثقيله بظهره
فيا هيه ياللي غرك الوقت تختال = (كل يعيش بحسب رايه وفكره)
كتبتها من طيب مدري من هبال = وقفلتها لان القلم جف حبره
يحيى ابن فالح ابن السريحه الاحمري
هول الليل