[علي الخطيب]

بعد غياب طويل!

الله يهديهم الدحيمي والاكلبي والاخوان بآخر قصيدة

طاحوا فيني مدح وانا ما استاهله والله

عقبها قلت منيب منزّل الا شيٍ يجوز للجميع

ولا يبون يتحسّفون على اللي قالوه

يقول ابو محمد :

من طنخة الفكره ومن شاعر يجوع=ومن باب محدٍ مرّ قبلي خلاله
اسّست معنى واستعاره وموضوع=وصنعت مجد ووجد واوجدت حاله
ولان الجفاف اللي بدى بي من الكوع=غديت لا منّي تراكيت عاله
لذلك استاذنك لا جيت بدروع=افضل من اللي صافحك في عجاله
انا خطيب القاف والراس مرفوع=تميمتي منبر وبشت ومقاله
غيري نسوه الناس في ظرف اسبوع=وانا بسوّي وسط الاعلام هاله
ودام الحميّا بالشعر حقّ مشروع=شفني وانا اللي محتمي بالجزاله
وشفني على شطّ العنا صرت ينبوع=اخلط ملوحه وآتجدول زلاله
لا الجزر وطّاني ولا المدّ بطلوع=ولا الموج غطّاني ولا السدّ ناله
فيني زوارق طفل وحدودي زروع=وتمثال طين ونسمتين ورساله
تسبح بحسّ وشلّة حروف وطبوع=ويضماني حظّ وبسمتين وسهاله
انسان لمّا تذرف عيوني دموع=القى محاديري على سيل واله
واذوب واطفو فوق متنه وموجوع=واضمّ اشيائي حرامه حلاله
الين وصّلني لداري على طوع=وما ينشد الرجّال غير اكتماله
وفجّأه حيا بي قلب والتامت ضلوع=وقدرت اميّز من يميني شماله
ونبت لساني واصرخ الصوت مسموع=وابصرت عقب المهزله والجهاله
واكملت نصف الدين واسعدني ربوع=وخايف يضيع النصف الاوّل خباله
والله رزقني شعر وازدانت فروع=يوم انكتب لي تستمرّ السلاله
خايف عليه من الهوى حرّ وصقوع=يالله وانا ما اريد شيٍ بداله
الشعر ولدي هادي بكاه دلّوع=وشافه فؤادي وسط حجري وشاله
اوّاه لا من نام ديوان مطبوع=وحسراه لا من صاح في وسط آله
حديث يصبغ بالمعاليق والنوع=فريد في تركيبته واختزاله
كنّي على بحوره مموّج ومدفوع=لاجل اصرخه في ذوق ولاّ دلاله
على سفينه بين شعّار ورقوع=مستشعرين تبلّل اقدام اصاله
انا خلاصه من عنيزه ومنزوع=انا اختصار ابيات فنّ الاطاله
بالضبط مثل الشمس في حزّة سطوع=واقفت وخلّت للنجوم البساله
احكي شعر ابكي هوى اشكي قطوع=بسّ الرجل احلى شعوره لحاله