مساء الخير للجميع /
ارجو ان تكون عند حسن الظن..
ماهو بذنبي.. يومهم عاملوني=على اساس اني تخاريف /وجنون
واضح ملامح بس..هم اوّلوني=على حسب تفكيرهم كيف مايكون
امّا انا /مهما كبرت بعيوني=مازلت اصغّر نفسي باي مضمون
عشان اشوف اللي سبق واعجبوني=على اعجابي كيف قدروا يحوزون؟
تثيرني الدنيا..وافكّر بكوني=وارتب الاشيا من اعلى/الى دون
على حسب ماتعتبرها..ظنوني=ايماني بترتيبها/ اصدق اظنون
وان صحّت بترتيبها صدقوني=وان كذبوني مابتفرق.. وش ايكون
يكفي على قد التعب كافئوني=يكفي لمحت الشكر بافواه وعيون
واللي تناسوا عمد/ لايشكروني=انا اللي اشكرهم على شان ينسون
ماوقّفت عندي على اللي/ نسوني=انا قبلت اعذارهم قبل/ يحكون
اللي يحز بخاطري /من قروني=ثم فسّروني زي..ماهم يحبون
تعبت من حمل السما/ يامتوني=يومي لقيت انجومها الف مليون
ولقيت كل الوانها غير لوني=اللي نسجته من خيالي على هون
صبيت من ضوضائها في سكوني=لين انبتت من طلعة الصبح/ ليمون
صباح مزعج.. وانقرا في جفوني=البارحه لا حس/ لا طعم /لا لون
كان المسا ساهر لحاله..بدوني=وانا بقيت بداخلي شبه مسجون
كم سولفت لي عن طعوني/ طعوني=لين الحناجر صارت اطفال يبكون
طارت/ عصافير الفرح/ من غصوني=وتساقطت من حولي/ اغصان زيتون/
بالله ياطراف الحقول.. اسهروني=وقولوا /لحبّات السنابل/ يباتون
في قارس اشتاي ارحلوا واتركوني=يلين ماباقي..فصولي يعودون
كانوا هنا من قبل عام وسهوني=وانا بقيت/ برف الاوجاع/ مركون
مرّوا مرازيم السحاب وخذوني=وامطرت معهم/ حزن/ وآلآم /وطعون
واسقيت قيعان الفلا وارتووني=واعشبت عبره /واثمرت دمعتي كون
يسبح لحاله في/ مجرة شجوني/=عالم مغاير في فضا شبه ملعون
غريب /ببلادي /وناسي /وكوني=عابر سبيل بفكر..غامض ومجنون
وواضح ملامح بس للي عطوني=فرصه اعلّمهم انا منهو آكون...’’