فوز ..
وااللي من 18 سنة
قطعته الألسنه
ومن خميس الى خميس
يحتري الحظ التعيس
عنده الأسبوع.. ( 6 ايام )
وسابع ايامه .. نذير اعداام
ولا اقبل الجلااااد ..
سيف ونطع ولثام وحسام
تنشده بالعين دمعه :
هو بقى بالعمر شمعه ؟؟
هو به اسبوعٍ يمرّ بدون جمعه ؟!!!
فوز ..
ياطفلة قدر ..
ياسمينٍ ماسقاه الاّ الدهر..
دم وقهر
تعرفين الحزن ؟؟ او هو يعرفك ؟؟!!
او تلاقيتوا بلا سابق وعد ؟؟
من شرى لك لعبة العيد الجديده؟؟!
ليش ماتشبه هداياك الهدايا ..؟!
كل عيد .. والهدايا
جرح واحزان وقصيد
ولو عطوك الليل .. لول
وزخرفوا عقدٍ فريدٍ ..
من النجووووم
ولبسوووك الصبح عااااج
الحذر لايخدعووك ..
يمكن انك عايشه ..
بطحاانة امك
بس .. مالك غير ابوك!
مالك الا ّ وجه ابوووك!
ماحمى حقل السنابل غير مرجامة هله!
وان نسوا منه العصااافير بتجيه .. وتآكله!
وانتي .. اجمل سنبله!
لكن خلااص ..
قحّم البندق ..
وبان الشيب في راس الرصاااص!!
..
فوز .. وش معنى الحياة وتالي الحيّ الـتراب؟
مقـبره .. والميــت والله ماتــردّه مقـبره
فوز .. لا صرتي مره / تدرين ليه الظن خـاب
وليه ابــونا آدم من الجنه خـرج سبّة مره!
فوز .. ما تروي مهـاميه الزراج إلاّ الســـراب
والهبــوب الذاريــات اصفى ملامـحها .. غبره
فوز .. ويش الصاعـقه تآخذ من البيت الخراب ؟
والأمل كهلٍ بكى .. يومن ضحـك شيـب شعره
فوز .. لو تطمن مشــاريف النـوايـف للهضـاب
واستوى الغارب مع حدب السنام اش نخسره ؟
لا الذّره كانت ذنوب .. ولا الرحا منْ الذنب تاب
وحكمـة الله يالرحا .. تاطا على خشـم الذّره!!
والبعــير..
البعير ..
ليا ِدبَرْ ظهره نقـض ِدبَرْه غــراب
وان شكا ضيم اظهره .. وش بالبعير الاّ اظهره ؟!
الرضا / ماله صـديق ليا زعل / غير العتــاب
والعفـو / ماله عــذول / الاّ ملام المقـدره!
كيف يالتـوبه حضورك يبري جـروح الغـياب ؟
واطهرك .. ذنبٍ يصك البـاب دون المغفـــره?!
فووووووز..
يبطي الظن ظنّ / ولو فتق صدر الصـــواب
وابسـط اقـدار المنــايا : / كلّ جــمع تبعـــثره!
قالها اللي راح يستسقي شهالـــيل السحـــاب
ابدويٍ ..
ابدويٍ ..كان يطـفي القيــض بظـــلال شْجـره
ان ذكر حـيّه .. وسَمْ دمعه على ردون الثيـاب!
وان ذكر ميـته .. عقـل زامـل ذلــوله وانـحـره!
وشــاعرٍ .. ماسخــّر اشعــاره لتلعات الرقــاب
اجـــوديٍ .. مير دق الفقــر بـابـه واقهـــــره!
راح يحدي له حيالٍ واغفلت / راحت .. ذهاب
مالها وصفٍ يبيـنه ( النبـــيه ) ويضهره!
مابقى الاّ ( فاطر ٍ) لاهي ( مسوح ) ولا ( ركاب )
لا ظمت / تشرب بجلد حْــوارها مستبشره
واقسمه نصفين حظّه / نصف ..بآحزان وعذاب
ونصـفه الثاني .. خـذاه الموت/ يوم استكثره!
مانشد ( يـوسف )؟؟
مانشد (يوسف ).. عن الغي وقميـصه والذياب!!
ما نشد ( يعقوب ) .. دمعه وش خذا من محجره ؟!
المصيبة..
شوف المصيبة ..
لا رمى الفارس بصدره للحــــراب
مادرى انه كلّ حصني / في بلاده عنتره!!
فوز .. لاصرتي مره / تقرين صفحات الكتاب
وتعرفـين ان الزمن رجــّال / لاصرتي مره!!
وتعــذرين اللي قفل حظّـه بوجـهه / كلّ بـاب
وانفـتح له بـاب لكن / كان ..
بـاب المقـبره!!
محمد الدحيمي