من مشاركاتي في مجلة فواصل....
يقولون تدرس؟ قلت ماعاد فيه دروس=خذينا الدروس الوان واشكال وانواعي
وذلحين لبّسنا كفوف الهبال دْسوس!=وشوفوا فواصل وادخلوا صفحة اقلاعي
مجلّه على اللي غيرها تلْعب المنْكوس=تغنّي طرب وتْغيض وتْطق الاصباعي
يوم ان الصحف تنشر مجامَل وحب فلوس!!=فواصل تسوق فلوس وتْجيب الابداعي
وانا اكتب عن المحْسوس واكتب عن الملْموس=لو ان القلم والحبر من روس الآفاعي
واعبر عن اليائس واعبّر عن الميئوس=واعبّر عن هموم البريد وعن الساعي
ولا احب من طبعه على كل كف يبوس=ولا كل كف يمَدْ للبوس نفّاعي
ولاقول هذي ضان والا هذيك تيوس=وليه الغنم تذْبح ولا يذْبح الراعي؟
ولاقول للريّس علامك على المرّيوس؟=ترا حذْفِتِك في جبّهته مالها داعي
ولاقول يالمسمار كنّك تجي دبّوس؟=ولاقول يالدبّوس ليه الورق ضاعي؟
ولاقول ميد الثور ياحضرة الجاموس=اخافه يسيء الفهم ويحطّم اضلاعي!
ولاقول يامريكا تراكم تبون الروس=ولاقول ميد الروس مافيكم نخاعي
وكلمه بسيطه لو على شمْعة الفانوس=ولا هرْجةٍ صلّفه وكشّاف وشْعاعي
اعبّر بها من نفْس والقى قبال نفوس=واشوف الرضا واشْرَه على بعض الاوضاعي
مع السوق طيّحني وبين الجبال عْسوس!=هذا مشْيته عدْله والاخر تمرّياعي!
وراسٍ كِدَشْ والراس الاخر عليه الموس!=وهذا معه معْجب وهذا له اتْباعي!
وكلٍ يفصّل ثوبه اللي عليه يقوس=ولافيه نفس الا لها هم واطماعي
تفائل ولاتحْزن وخذ لك عبَر ودْروس=ولا ضاقت الدنيا فجوج الله وساعي