طاسه يقولون وسط البحر غطّاسه
والبحر ياسعيد من يسبر مغاويره
يوم العرب في دوام وحزّة دراسه
رجلي مع الدرب وابطت بي مشاويره
خليت لك طعسك اللي كله بساسه
لأنك مغبّر .. ولا تحتاج تغبيره 
بعض المواقف ترى تحتاج لسياسة
والتاجر يضيع لاكثروا مخاشيره
ماظنتي ينفعه لو يعلن افلاسه
والدار عقب الفلس كثروا مساييره
يا اصحابنا يومكم هل عرف وفراسه
ومقدور يبخص علي التركي معاذيره
ظرف العسل من مناحلنا وحن ناسه
مير ادعو الله يدبركم بتدبيره
تقول خيره سولافه واكسرت كاسه
وان قلت وش بش كسرتيها تقل خيره
قولوا لها كلّ غرسٍ وله غرّاسه
وراعي الشعير الحذر لا تنهب شعيره
واذا لكم سيرةٍ .. للدرب عساسه
خذوا معاكم سولافه ياهل السيره
طبعي كذا كل نود اشمّ نسناسه
واللي اعزّر به استأثم بتعزيره
وياسعيد كلن عطاه الله على قياسه
ومادام كلن وله قدره وتقديره
عشاي نجدي ثني ومقابل راسه
وعشاك ..كبسة دجاج وراس تعميره