[عبدالرحمن الربيّع]

مساكم / صباحكم خير وسعاده ..

هذا نقل مباشر لاسواقنا بكل ما فيها
اتمنى انها تعجبكم

في داخل السوق
لاحق وملحوق
ناس نازله تحت
وناس طالعه فوق
وناس تركض هنا وهناك
وناس تمشي برفوق
وناس مايهمها احد
وناس عندها ذوق
ناس واجناس
ولهم اختلافات وفروق
في داخل السوق
.
.
في داخل السوق
محلات
ذهب وعطورات
شنط وإكسسوارات
اقمشة وساعات
ألعاب وكماليات
والكل ينادي
تخفيضات ..تخفيضات
تنزيلات .. تنزيلات
وكل شي بريال
وكل شي بريالين
اشتري قطعه وخذ ثنتين
اشتري حبه وخذ حبتين
والكل يركض ورى الموضه
يدورون الجديد
الين صارت فوضه
بس منهو اللي مستفيد
وكلها لحظات
وتخوى المحفظات
وكانه بوق
ماعندهم ذوق
في داخل السوق
.
.
في داخل السوق
واحد وزوجته وعياله
الحرمه جايه تشتري لأختها حفاله
وهو مبتلش مع اطفاله
شايل واحد وماسك عقاله
والثاني راح للبقاله
والثالث مضيّع نعاله
وفجاه يدق جواله
وعلى الطرف الثاني خاله
تراكم معزومين في فلتنا الجديده
ويقول ابشر ياخال
ابشر بالنزاله
ولسان حاله
يقول صرنا على الحديده
وفعلا حالته حاله
واذا اشترى لهذا وهذا
آخر الشهر وش بيبقى له ؟
صدق ماعندهم ذوق
في داخل السوق
.
.
في داخل السوق
شاب وسيم مهندم
ما غير يتلفت ويتبسم
ماسك بيده جوال
ومزبط العقال
كاوي الغتره صح
والمرزام يجرح
ويتلفت يمين وشمال
ويقعد على هالحال
حتى لو انتظاره طال
وعلى سبيل المثال
كل ما مرت وحده قال
وش هالعيون اللي تذبح
حتى لوهي عجوز ولابسه جلال
والكل يسب ويشتم
رح جعلك ماتربح
وهو مايبغى يفهم
ومع كل سبّه يصمم
لازم اليوم يرقم
مسكين هالوسيم المهندم
طاح في يد واحد مايرحم
ولقوه مطقوق
والثوب مشقوق
والجيب مفتوق
والخشم مدقوق
ويتمتم ماعندهم ذوق
في آخر السوق
.
.
في خارج السوق
عجوز واقفة عند الجدار
تحتري السواق كومار
وهي تتمتم المسكينه
وين راح هالحما ....
انا قايله له يجي الساعة تسعه
وانا لي ساعتين هنا منرزعه
الابو خرج
والعيال حدث ولا حرج
و أخيرا جاها الفرج
بعد ما ريقها نشف
ودمها فار
وملت من الانتظار
فجأه ظهر كومار
وقبله شوية غبار
وقال اسف ماما
انا يبغى يلف يمين
انا روح يسار
وهو كذاب ومطفوق
ولا عنده ذوق
في خارج االسوق
.
.
في خارج السوق
جلست ام مرزوق
وفي حجرها بنتها الصغيره
تبيع العاب ومكسرات
وملابس وحلويات
ماهو بيدها لانها فقيره
وتلبي لعيالها مطالب كثيره
مرزوق واخته منيره
وتساعد ابو مرزوق
وبصوت مخنوووق
تنادي على خمسه على عشره
يارايحين ياجايين
ياللي عندكم ذوق
وفي خارج السوق
وفي داخل السوق
ناس مازالت تحت
وناس طالعه فوق
ناس مايهمها احد
وناس ما عندها ذووق