[عبير]

قبل ست سنين من تاريخ البشرية. وبالتحديد في مدرستنا اللي هي عمارة بس يقولون انهامدرسة
بدأت الحصه الأولى في مادة الجغرافيا وجاءت الأستاذة الله يذكرها بالخير وقفت واستوت على الأرض ورفعت القذلة وإلتفتت بوجه لليمين تمسح باقي البلاشر اللي حطته بعد الفسحه ثمن قالت يابنات من يعرف عجائب الدنيا السبع من زود حماسس قمت بدون مارفع يدي قالت الأستاذه :ؤش عندتس من أجابه يامال فرقا العين (لاتلومونها كنت مسويه. اللي مايتسوى ) مالكم بالطويلة قلت: أنتي من جدك ماحد يعرف عجائب الدنيا السبع سؤال مال أمه داعي والبنات يضحكون حسيت إني شخصية
قالت :يابنت الفلاني .أخلصي قلت عجائب الدنيا السبع حدائق بابل المعلقه وصديقاتي اللي تصفر واللي تقول ياهو واللي تقول من بعدك مالها داعي المدراس المهم قالت منتازة وغيرها هي سبع عاد هنا فحطت قلت أخبرها وحدة والسبع الباقيه تمويه بس. ثمن أخذتها بالصوت قلت أنتي الحين تصدقين أي شيء ينقال لو قالوا لك ان شارون مسلم صدقتي الناس مايتركون الإشاعات ياأبله مها هي كانت أعجوبة وحدة لكن بعد مابهروا السالفة
ودخلوها الفرن صارت سبع عجائب ولا وش قولك قالت أخلصي علي وقت الحصه راح أجي لمخي من هنا من هنا أعطيه رشوة أقوله تكفى يابن الحلال لاتطيح وجهي قال معصي أنا مهنق على حدائق بابل. قلت ماعرف قالت خبري فيك كذا حزت في نفسي طلعت من الحصة رحت للمكتبة حقت المدرسة ودفنت نفسي في الكتب ((كبيرة كبيرة كذا بدايه العظماء )) عاد من زود مادفنت نفسي بالكتب ضيعت أنا جيت ليش>>سبهه المهم والقى كتاب مغبر عنوانه ( عجائب الدنيا ) أخذت الكتاب ولبست نظارتي ودخلت في عالم العجائب تمسكوا. الموضوع به قليل من الهلس ماحد يلتفت له


الاعجوبة الأولى




أهرمات الجيزة
ماحد منكم مايعرفها اللي ماشافه على أرض الواقع شافها على أرض
tv طبعا انتم تشوفونها كذا شي من برا وماتدرون إنها كانت مقابر الفراعنة >>لايدرون هم مثلك لأنهم كانوا طوال طوال أقرب مالهم برج ايفل والفيصلية متقابلين وعشان مايزحمون الناس في المقابر كل واحد حفظ ماء وجهه وإشتغل شغل موب صاحي على قبرة

وش أسماء هالأهرمات ؟
وش أسماء هالأهرمات >> بس ماطلبتي شي
هي أسمائهم عاهات والله شي ماتتخيلونها بس مصاريه يعني >>> تحيه للشعب المصري قمطت
الهرم الأكبر ( خوفو )
طيب وش هو من لحيه هالهرم ؟
مساحته كبيرة هالاهرم لأنه كبيرهم هالخوفو لبى عيونه الكحيلة
طبعا وش تبون بمساحته والله لو إنكم بتشترونه أقول ماله داعي >>> قلبت وراها
طبعا هالأهرم إستغرق بناءها عشرين سنه يعني عمر والله وش قال الله في مقابرنا خمس دقايق يحفرون ونرمي فيها ضعيف هالخوفو عمر كله راح وهو يحفر قبرة ثمن مات ماإستفاد من حياته الدنيا شي
طبعا غير العشرين سنه راحت عشر سنين في الديكور الداخلي والممرات وغرف النوم وكذا وقسم كل دقيقة اضحك على هالخوفو تفكيرة مثل تفكير جحا الحين غرف نوم وحركات من جو وممرات وانت بتموت يالدثوي يعني كانك يابو زيد ماغزيت مصاريه ضيعتهم العباطه



*****
الهرم الثاني خفرع :ياعيني ياعيني على الأسماء الأبو خوفو والإبن خفرع ماأخس من قديد إلا عسفان
نشوف خفرع وش هو من لحيه طبعا خفرع رابع ملوك الأسرة الرابعة إبن الملك خوفو تزوج هالسنافي من بنت يقال لها عنخ >>> ياعيني ياعيني الأبو خوفو والرجل خفرع والزوجه عنخ اقدر العاهات اللي كذا
المهم حكم هالخفرع ست وعشرين سنة طبعا طول الحكم وهو يبني في قبره , قبره طبعاً أقل مساحة من قبر أبوه بار لبى قلبه ماقدر يكبر قبره عن قبر أبوه


*********
نجي للهرم الثالث وإسمه منقرع
طبعا لاتشرهون لأن أبوة قبله اسمه خفرع يعني ذوقه خايس في الاسماء ماله ذنب وليده
طبعا هــ القبر أصغر من قبر أبوه >> "]اقصد هالهرم أصغر من هرم خفرع
]طبعاً مسوي ممرات وكذا بالجرانيت والشغل المأنتك
وفي آخر الهرم غرفة الدفن عاد هي أكبر شي في الهرم متوسعين الله لايضرهم

خلصنا من راعين المقابر





نشوف الأعجوبه الثانية
تمثال هليوس رودس




طبعاً صار عندكم مثل المضاد الحيوي من هالاسماء يعني من بعد خوفو وعنخ يصير اسم زليخة أكشخ شي بالدنيا طبعا هالهليوس الله يسلمكم صلحوة اليونانين لآلهتهم أعوذ بالله عشان يحتفلون فيه في المناسبات اللي يحسبونها مهمه طبعاً تعاونوا هاليونانين وقوم تعاونوا ماذلوا وفي سنه 283
والتمثال كاشخ يزقح وشامخ في شوراع اليونان لكن ربي وراكم فيه جاء زالزال لليونان وحطمه تحطيم وراح تعبهم هباء منثورا ومابقى من هالهليوس الا حجارات يلعبون فيها بزرانهم وقت الظهيرة >> ليش احد قايلك إن عيالهم هم عيالنا


الأعجوبه الثالثة
منارة الإسكندريه


مدهرين المصارية في الدنيا كل حاجه عندهم من عجائب الدنيا
هالمنارة يطولي بعمركم بناها بيطلموس الثاني تكلفوا في هالمنارة وبالغوا مبالغة ماهيب بسيطة فيها لين استحقت إنها تكون من عجايب الدنيا السبع طبعاً بناء المنارة كان من الحجر الجيري أما الأعمدة كانت أغلبها من الجرانيت ..وزينوها بالرخام والبرونز..و"المنارة"كانت مبنية بالحجارة المنتظمة والمطلية بالرصاص على قناطر من الزجاج طبعا هم مابنوها عبط رغم انهم أهل عبط لكن بنوها عشان تكون هدايه للبحارة في سواحل مصر كان في قاعدة المنار ذي نار هالنار ينعكس نورها على جوانب هالمنارة وتنير لهم الدرب



نجي للأعجوبة الرابعة
ضريح هاليكارناسوس


مثل ماقلت لكم فوق بخصوص الأسماء خلوا الوضع عادي
يوم مات موسولوس ملك كاريا قررت زوجته تسوي له قبر فخم وسمته ضريح هاليكارناسوس
وجابت معمارين مشهورين يضبطون قبر بعلها الراحل وحطوا فيه من هالتماثيل لين قالوا آمين
وفي قمة الضريح حطت تمثال للملك موسولوس وزوجته وهما جالسين في عربة تجرها خيول أربعة زوجته ينطبق عليها المثل اللي يقوم (( ياليتنا من حجنا سالمين كان الذنوب اللي علينا خفيفات )



نجي للأعجوبة الخامسة
تمثال زيوس في أولمبيا



الناس في عهدهم الغابر كانوا يحسبون ان الخير والشر تنبعث من التمثال
ويقدسونه وهذا أعوذ بالله هو رب الأغرقين صنعوا التمثال هذا من العاج والذهب وإرتفاعه 15 متر والكلام على ذمه قوقل لكن ربي سلط عليهم نار شبت في هالتمثال شب لين صار ماله أثر
ينطبق عليهم المثل ((كذب كذبة وصدقها )) هم اللي بنوها ويعبدونها

نجي للأعجوبة السادسة
معبد ديانا بارفسوس




طبعاً هالمعبد ياكثر ماانحرق بنوهــ في تركيا ثمن جاء ايروسترات وأحرقه
ثمن قالوا مايخالف وفي اليللة االي انولد فيها الإسكندر الكبير بنوه
من جديد لكنه هالمرة تدمر تدمير وإنحرق ومابقى في هالمعبد الا بقايا محفوظة في برطانيا والحجارة الباقيه ماوفروها بنوا فيها كنيسة ثانية >>> ذولا من وين يفهمون مايتوبون
نجي لـــ أجمل شيء في العجائب




الأعجوبة اللي عشعشت في قليبي وكل يوم اتحلم فيها :وثقافتي هنقت عندها
حدائق بابل المعلقة هالحدائق بالعراق أيام كانت العراق خضرة وجه حسن
بناها واحد تكانه يقال له نبوخذ نصر >>مثل ماقلت خلوا الوضع طبيعي
هالأعجوبه كان لها 8 بوبات اطلقها باب يقال له عشتار
طبعاً لبى قلوبكم هالحديقة تسر من ينظر إليها وتدخل على قليبه الفرح والسعادة اللي مغتلق يتبلطح فيها وينشرح صدره اللي الدنيا معطيته على ظهرة يجي فيها ويشوف عظمة خالقها
في هالحديقة مالذ وطاب ثمرها طول السنه فيها أشجار شتوية وصيفية
مابنى هالأعجوبة الا الهنود اللي جابهم الملك وخلاهم يشتغلون ليل ونهار لو سوينا مثله كان السعوديه بكبرها أعجوبه بس وش نقول بس


هذا موضوعي بين ايديكم ان جاز لكم خير وبركة وان ماجاز لكم حيل الله أقوى