|
## طريقه عمل قرص الجمر ## ( طبخات بريه )
السلام عليكم ورحمة الله وبركاته
ياحي الله مشرفين واعضاء شعبيات وزواره
مدخل 
طبخه قروم كلها وسط مله
............. كرشه وقرص الجمر معها يزيني
مع شاهي مخدر وفنجال دله
........... .. تبعد عماس الي فواده حزيني
قرص الجمر
( حيث انه مشهور وسهل نبداء به  )
المقادير :
دقيق بر
ملح
ماء
( حتى المقادير تساهيل يالله لك الحمد )
التحضير
في البدايه نجيب لنا سحله والى غضاره والى قدر ( الى قريب تله لك )
ونحط الدقيق والملح والماء ونخلطه مع بعض
نبداء بالعجن
ونخليه لها شوي لين تخمر العجينه وتماسك
ترا زار الكموم عشان الصوره 
ثم نجيب الصحن والى كيس ( وين تلقون مثل هالسماحه في الطبخ ) ونرش عليه شوي دقيق من حدر بحيث انه يسهل الفرد وماتلزق العجينه ومايخلي التراب والرماد يمسك بالقرص عقب
ونفرد العجيبنه بحيث انه تصير مثل الخبزه بس اسمك منها مثل هالصوره
وطبعا نصير مولمين الضو وتصير في محل يسهل فيه الحفر والدفن ( مله )
وندفنه تمام حدر المله والمجمار وطبعا النار تصير بعيده عنه شوي بحيث ان الي يصير فوقه الرمل والجمر
نخليه من نص ساعة الى خمس واربعين دقيقه على حسب سمك القرص
ثم نظهره وننفضه من الرماد البسيط الى يصير ماسك فيه
ونحك بعض المناطق الى فيها حرق
يطلع لنا قرص ولا احلى
وطبعا تقدر تاكله على عدت وصفات ياما يفتت ويضاف له عسل والى سمن والى على مرقه والى مع الشاهي 
وبكذا خلصنا من الطبق الاول اتمنى يحوز على رضاكم 
وتحيتي للجميع 
|