السلام عليــكم ورحمــة الله وبـــركاته
مصـــافحة أولـــى ... أضعــها بين أيـــديكم ...وأتـــرك الحكم لذائــقتكم.
يلوح القاف في مزن الخيال ويمطـر التصويـر=وتزهر به جراهيد الـورق لا سالـت أقلامـي
وأصوغ أبيات شعري يا زمان الحكي والتنظيـر=بعد ما صار جورك يا زماني مصـدر الهامـي
زماني , والسوالف بعضها يستوجب التشفيـر=بأسولف لك على وضح النقى دام الهدف سامي
أنا عبد ٍ فقيـر لعفـو ربـي ذنبـي التقصيـر=إلهي ما لجيت الا لوجهـه مـن جفـا أيامـي
عجزت ولا لقيت لقسوة أيامـي معـي تفسيـر=رياح الحظ تعصف والضحية مركـب أحلامـي
وردت بـذود هقواتـي ودورات الليالـي بيـر=ولكن للأسف صدرت مالمـورد وأنـا ظامـي
طموحاتي مثل تغلب وجور الوقت سيف الزيـر=لو ان له ثار يمديه أقتنع مـن كثـرة آلامـي
ياكم مرة تحديت الظـروف وخاننـي التقديـر=وكم مرة حكمت وحكم وقتي ينقـض أحكامـي
وكم شبيت شمعة من تفاؤل في رجى التغييـر=حسافه!! وش تفيد الشمعة ان صار البصر عامي ؟!
نتيجة ما سبق قررت أخطـي حاجـز التبريـر=وأوقف للتحـدي يازمانـي وأكـرب حزامـي
مادام العمر مرة وش يفيد الصمـت والتفكيـر=أبأعلنها بوجه الوقت ثـوره وأركـز أعلامـي
ومادامي متكل باللـي بيـده الحكـم والتدبيـر=فبأرسي في وسط بحر الظروف وموجها الطامي
سئمت الواقع السلبي وعذر الخير في التأخيـر=رضوخي يازمن غلطه عسى الله يغفر آثامـي
أباصنع واقعي بإيدي وأصير إنسان لـي تأثيـر=وبأرغم وقتي اللي طول عمره يعشق إرغامـي
زماني , جيت ذالمرة وأنا قانص وعزمي طيـر=ليا لاحت لـه الفرصـة يعـود مخلبـه دامـي
نويت, وعل في شي ٍ نويته يـا زمانـي خيـر=وعسى ربي يقـدي للمعالـي خطـوة أقدامـي
زماني , في ختام السالفه لـك فايـق التقديـر=يقدمه الفقيـر لعفـو ربـه (جابـر اليامـي)
جـــابر بن صـــغير بن قـــادرة