|
عيــن وهــدب !!
عين وهدب
( كانت معي عين وهدب )
كانت اذا شبّ الحطب .. في جوف جوفي
تنتشل جوفي وتروح
للسما الزرقا
للمسا
لليل الطويل
للشجر
للغصن
للورقا
وتقطّع اعناق الجروح .. وتعود
في يدّها خوفي
وفـ عينها تحنان
وفـ خدّها بسمه
وبـ احضانها جوفي
.
.
كانت معي ضحكه .. وتعب
وكان الأرق لا زارني .. يرتاع
من لحظها
من شمسها
من همسها
من لمسها ايديني الجياع
ويعتق لوجه الله .. وسادتي
ومرايتي
وروايتي .. ويروح
تارك لي الضحكه
وشايل على كتفه تعب
.
.
كانت معي
وما هي معي
ولو هي معي
ما ادمى خدودي .. سهادها
ومنديلها ما ناح في وجه العدو
وقنديلها ما صاح في وجه الصديق
ولا انحنى جرحً قديم
وبيتً عتيق وشمعدان
ولا انكسر حرف وطريق
ومن بعدها !
ما عاد لي ضيّ ومسا
ولا سما زرقا
ولا شجر
باح الحطب
وما غمضت لي عين
وانسلّ من عمري هدب
|