[عبدالله الشغيبي]

انا عايش ولا ني عايش ٍ في الحل والترحال=مدام اني غريب الدار في حلي وترحالي
تمر سنين وتعاقب وانا صابر على ها الحال=هموم وغربله واشكي عنا همي لغربالي
ولا لي صاحب ٍ صادق جميع اللي نشوف انذال=صديق المصلحه والا صديق الضحك والمالي
يحلّ الضيق لا حل الظلام وهجّعت لزوال=هجم جيش الهموم وقمت ابارز جيش بلحالي
على الموال هذا من سنين اقفت على الموال=اداري ضيقتي وابعد بها عن لوم عذالي
اقول مع الصبر يمكن يجي بعد الفراق وصال=واسلي خاطري لاقلت بيعود الفرح تالي
وتاخذني جنون الشوق للوقفه على الاطلال=بدون شعور ياخذني الحنين لحيها الخالي
اجي واروح وعيوني على البيبـان والاقفـال=اناظر والخيال يعيـد ذكـرى شوفـة الغالـي
واذا مني وعيت اركى علي من الهموم جبـال=ولا تنـزاح كـود انـه يعـاود لـي تخيالـي
تراودني حلوم ومـا تحقـق حلمـي الامـال=صواديف القدر تقتل حلـوم العمـر وامالـي
كذا حظي ولا عمره تفـرّع بالعـزوم وطـال=ولكن الرجاء فـي وقفتـه باقـي ولا زالـي
الا يالله تبدل ميلـت الحـظ الـردي بعدال=تعدلها ونشرب بعد كـاس المـر مـن حالـي
والا يا وجد حالي وجد من دمعه ذرف همـال=غرير ٍ فارق امه لا معـه صاحـب ولا والـي
على فرقا وليف ٍ له في اقصى خافقي منـزال=وانا عقبـه لذيـذ النـوم راح ولا تهيالـي
اذا طال السهر والفكر حلق بالهموم وجال=طرى لي زول غرو ٍ ما لقيته بين الازوالي
تذكرت العيون الخرس والمبسم وحبة خال=على وجنه كما بدر اكتمل مايضوي الا لي
و ثغر ٍ لا ابتسم فرق الثنايا تذهل العقّال=واذا شافه خفيف العقل طير عقله الخالي
بمردوع الشفا بلسم وطب اللي عذابه طال=وفوق الصدر شي من الفواكه طعمها حالي
اذا سلهم برمش العين قلبي باتجاهه مال=على ما طوح النظره خفوقي معه ميالي
واذا حد النظر صوّب لقلبي رمشه القتال=انا المقتول واعشق يا عذولي سهم قتالي
رمتني بالسهوم وصوبتني لين دمي سال=وانا من بعدها لاني صحيح ولاني بسالي
هنوف ٍلا مشى وجل ٍ سريع الخطوه وبتال=شبيه الجازي اللي ما يصيده سهم بتالي
صغيرة سن واهداب العيون الناعسات ظلال=وشرطان الذهب تسدل على المتنين شلالي
اناظر جيدها واحسد عليه العقد والسلسال=اناظرها وتدرج رمشها الفتان لشغالي
هي الفتنه ولا يقوى على طغيانها رجال=ولا انجب مثلها بين الاوادم صلب رجالي
رفيعة مستوى بالعيب ماتحكي بها العذال=عفيفه ماتعرض للردى والقيل والقالي
يحقلها على كل البنات بحسنها تختال=قلوب الغيد لا شافت حلاها تشعل اشعالي

.