بسم الله الرحمن الرحيم
السلام عليكم ورحمة الله وبركاته
أول حظور لي ها هُنا
قال منهو يا تهيض مايقول الا الثمين=وما يجيب من القصيد الا الزهور النافيه
لاتغنى في قصيده هز كل الحاضرين=وعطر اللي يسمعونه بالبيوت الكافيه
القصايد كان ماله معجبين وطالبين=عيباً الشاعر يقوله او يقول القافيه
والعقل لولا العقل ماكان به رجلا رزين=والسوالف طيبها برجاله اللي تافيه
وعقبها لك يا غرام(ن) جدد الجرح الدفين=جيت ابسئل والجواب بكلمتين(ن) دافيه
خبريني ليه كـنتي في خيالك تختفين=وليه عقب الوقت هذا تشعلين الطافيه
ألله أكبر لا ذكرت أيامننا أللي تذكرين=يوم أنا والليل وإنتي والمشاعر دافيه
أتذكر كيف كنتي تقربين وتبعدين=وأتذكر كيف كنتي في غموضك كافيه
وجيتي الليله وقصدك توقظين وتغـرزين=الخناجر وسط خفاقاً جروحه سافيه
يا حياة الذكريات الجارحة ، يا الطعنتين=أحتفي بي وأحتفي بك ، يا الجروح الجافيه
يا حياة الأمنيات الفاتنة ، يا الضحكتين=يا غيوما(ن) ما وراه ألا. الآمال السافيه
يا حياة الأبتهاجات ، أرجعي لا تُقبلين=ما بقى في وسط قلبي . لك مساحه كافيه
يا وجودي وجد منهو لا سعيد ولا حزين=بين ذي وذيك ضايع وأقرب اهلة نافيه
ويا وجودي وجد منهو دونه أقفال وسجين=في زلازل بوش أسير وينتظر وش قافيه
ويا وجودي وجد منهو ما يذوق الزاد زين=حالته خطرة وميؤسه ولا هي عافيه
ويا وجودي وجد منهو فارق أهله له سنين=ومن هله وديار ربعة ما تجيه اللا فيه
ويا وجودي وجد منهو شاف جور الدين دين=السعادة والوناسة .. من حياتة طافيه
ويا وجودي وجد غزه وأهل الاقصى العاجزين=من عبث جيش اليهود ودعم منهو رافيه
في زماناً به رأينا كيف ذل الأمتين=والملوك اللي تخضع والدلايل وافيه
ويا وجودي وجد من يضحك وهو قلبه حزين=لوعت به هاالليالي والحظوظ الغافيه
ويا وجودي وجد بغداد وشعوب الرافدين=يوم ضحوا فجر الأضحى في زعيم(ن) شافيه
من شموخة حدروه وصار في وضع(ن) مهين=عقب ماهو رمز شعب . اصبح ورجله حافيه
ويا وجودي وجد شعباً قتلوه الحاقدين=وصدورا نفطه وخيرة والغنايم ضافيه
جعل منهو لام قلبي .. يوم عود للانين= ينكسر حظه وحيله .. ياعساه الهافيه
أنتهت والخافي أعظم بس الأفضل مايبين=والقصايد ماتطيب الا بجزل القافيه
لكم خالص تقديري
لــ فايز الشمري