إقتباس:
الرسالة الأصلية كتبت بواسطة
نـــورة العجمي 
يمديني عليكم 
يا مرحبا ترحيبة البدو لسهيل
واعداد ما هبت سحايب مطرها
الف هلا ومليون مرحبا بشاعرنا المبدع مسفر الدوسري
هلا بك عد المطر كثر مانزل وكثر اللي بيجي
وبعددهم شكر لسما الخير 
على هديتها الرائعه لنا
اهديتي لنا الخير والنور والسيل لاعدمتك
اسئلتي
شفت ردك عن الشاعرات
هل معنى ذلك من تكتب شعر هجاء فيها عيب وتشّبه بالرجال
لأن الواقع احيانا يحتم ذلك
يقولون مادون الحلوق الا اليدين 
متى نرى مسفر الدوسري برئاسة تحرير مجله شعبيه ؟
يقول الشاعر الرائع فهد عافت في احد تصريحاته ان غازي القصيبي ليس شاعر ولا روائي
بل مسرحي مذهل ضل الطريق لأنه افضل من يجيد الحكي في العالم وكان ممكن لنا من خلاله ايجاد برنارد شو آخر 
؟رايك ياشاعرنا ؟
بما انك عشت فتره طويله بالكويت هل تذكرها وتكتب عنها ايام العيد الوطني للكويت وذكرى التحرير وكل المناسبات التي تربط الكويتين ببعض وهل قدمت نص للكويت في احد هذه المناسبات ؟
متى تقيم شاعر بأنه تافه ؟
الله يطول عمرك ياشاعرنا وترفل بثياب الصحه والعافيه
لاعدمناك 
يا مرحبا بك عدّ ما روّح الليل
والشمس بانت تجهر اللي نظرها
هلا والله ومليون غلا بالأخت الشاعره نوره..
نوّرتي المكان،
بالنسيه لأسئلتك أقول:
_ اللي يحدّ إنثى تقول هجاء ،بيكون قليل ذوق،
الهجاء سلوك عدواني،يعرّي نفسيه إنفعاليه، والإنفعال له أحيانا وجه قبيح ما يليق بوجه أنثى،فأي شي يخلي الأنثى أقل جمال بتصوري قليل ذوق..!
- الرجعه للمجلات مره ثانيه مرتبطه بظروفها.
- بخصوص إن غازي القصيبي ممكن يكون برنارد شو،أنا أيضا أعتقد إن القصيبي عنده حس ساخر جدا، من نوع السخريه المؤلمه في كثير من الأحيان، أما بخصوص إن الشاعر غازي الفصيبي ظل طريقه كمسرحي،أنا أظن إن كل شاعر في داخله فنان ما ظل طريقه،تلقين داخل الشاعر،موسيقي،أورسام مثلا،وهذا ممكن يصير لأي فنان مبدع، تحت عباية موهبته الظاهره يختبي سرب من نوارس.
- الكويت حبيبتي أكتب فيها بدون مناسبه،لكن ما أذكر إني كتبت لها في مناسبه رسميه!! فيه أحد يحتاج لمناسبه عشان يغني هواه؟! عشان يقول للي يحبه:أحبك؟!
أكتب للكويت لما تبكي
أكتب للكويت لما تضحك
أكتب للكويت لما أزعل عليها
أكتب للكويت لما أشتاق لها
وأكتب لما أعاتبها
هذي بس المناسبات اللي أكتب فيها للكويت.
- ما استخدم كلمة "تافه"،أقول "سيء".
شكرا ملايين لحضورك ،أسعدني نور كلماتك..