اهلا ياقمر
منوره يالغلا 
نبارك لأنفسنا انتي
بالنسبه للموضوع موقع شبكة الأقلاع اللي تأسس في شهر 12 سنة 99 م كان اول منتدى يحكي بالعامية, وظهر في قناة عامر الحمود تغطيه كبيره عن هذا الموقع وشعبيات ومن عباءته ظهرت منتديات كثيره , لكن يبقى للأقلاع تميزه وريادته
بيحتفل بعيد ميلاده العاشر الشهر الجاي .. وكان اول من فرض شروط بهذا النمط العامي لكن بدون ابتذال في الأسلوب
وأي عضو يستعرض خدمات الشبكه بيلاقيها ضخمه جدا وعملاقه وتوفر لأعضائها الكثير من الخدمات ..
شروط الاقلاع (لا تقول ما دريت)
مع محاولتنا لمنع المواضيع والردود الي فيها خنبقة او مخالفه للشروط اوالغير سنعه ونظراً للعدد الهائل من أعضاءنا الله لا يضرهم فترى ما يمدينا نشوف كل شئ
ومن الحين نقول بالفم المليان إن أي شئ يكتب يعبر عن رأي راعيه ولا نتحمل مسؤوليته
وبما ان هالموقع موقعنا حنا يالاعضاء المسجلين قبلكم وحنا حرين وبكيفنا عشان كذا اللي يبي يسجل معنا لازم يوافق على شروطنا ويكون مسؤول عن أي شي يكتبه ولا مهوب ملزوم يسجل وهالشي راجع له وبكيفه :
</B>1- كل منتدى من هالمنتديات يحق لك تكتب موضوع لكن يناسب المنتدى (مهوب تروح لمنتدى الهلالين وتقول ياروحي يالنصر ) والباقين يعلقون عليه وبكيفهم بيعلقون بيذبون هم حرين وما فيه اي قيود الا الحكي الماصل اللي ماله سنع أو الحكي الوصخ او قلب المواضيع شات واللي بيقول الحكي الوصخ والماصل اويقلب المواضيع شات مهوب أزين له واي شي تكتبه لنا الحق نتصرف فيه بأي طريقة كانت .
2- مسموح الذب بكافة انواعه وترا اللي بيزعل من الذب حنا بنستلمه ذب لأن الزعل عندنا ممنوع اما اللي يسب والسب هنا غير الذب البرئ ( السب يعني الألفاظ البذيئه ) ترانا بنقمبع به . ( بنقمبع به = بنسكربه ) ( نسكربه = نشوته سكروب أو بوز ايهما انسب لنا)
3-أي واحد بيكتب موضوع 100% باللغه العربيه الفصحى بكيفه بس لا يبلش خلق الله انهم يردون عليه بلغه عربيه فصحى , كل واحد حر يرد زي ما يبي واللي بيغثنا ويبلشنا الا تردون علي بالفصحى بنسنعه تسنيع مضبوط . ترا علمناكم لا تقولون ما درينا والا ما قرينا الشروط .. بكيفكم .
4 -تبون تحكون في الدين والسياسه مايخالف بس لاتقعدون تتفلسفون وتحكون في امور مالها سنع , ابعدوا عن الثوابت والطوائف والرموز و الجدل اللي ماينفع واللي يبي يحكي في هالامور ويتفلسف فيها فيه مية الف ساحه غيرنا يروح لهم يسولف عندهم ثم يجي يوسع صدره معنا بس يجيب لنا مناقشاتهم .. لا .. معصي .. ما نطيع .
5- مسموح التسجيل بأسامي الأقلاع كلها ما عدا المخله بالاداب العامه والأسماء اللي فيها اسم </B>عوايل او قبايل يعني اعقلوا , ترا مناب ناقصين ذب يجي بعده شي في النفوس
6- تتعهد انك ما تعطي كلمة السر لأحد موبعدين تجي تقول مهوب انا اللي قايل ذا الحكي اللي انكتب .. ترا هالحركات ما تمشي علينا .
7- تحميل صورك وملفاتك على مركز التحميل الخاص بالاقلاع
8- قد تصلك رسائل إعلانية عن طريق الإقلاع . . نبي نترزق الله وونفع سيرفرات الإقلاع وان حصل إزعاج نعتذر ويتم التواصل مع الإدارة لمنعها عنكم
9-اذا قريت الشروط كلها ووافقت عليها ونويت تسجل اختار لك اسم رايق بشرط مايكون احد مسجل فيه وترا اللي بيحط مدات في اسمه وجا احد واشتكاه انه مقلد اسمه بنشطب اسم الجديد ونخلي القديم والاسم الي تختاره انت مهوب حنا يعني لا تبلشنا غيرو اسمي .
شروط التفعيل للمشاركة في ساحة الإقلاع
</B>
إذا أنت عضو مسجل وعقدت النية إنك تشارك معنا لازم ترضى بشروطنا حقت التفعيل لأن المسلمين على شروطهم 
موب تقعد تقراها وتخالفها وتجي تقول وراكم مافعلتوني
والا تكتب لك موضوع مايسوى تعبه وتقول لنا وراكم تمنون علينا بالتفعيل؟
هذا منتدانا وحنا يالاعضاء الي مسجلين قبلكم حرين فيه كانه عاجبتك شروطنا والا اقضب الباب(ناس حمقيين 
)
وحنا بنفترض إنك خذيت فرة على منتدى المواضيع المتميزة قبل ما تسجل عندنا
وبنفترض إنك تدري عن نوعية المواضيع اللي تنكتب في المنتديات</B>
شروط التفعيل((لاتقول مادريت
)):</B>
1- خذ لك فره على منتدى المواضيع المميزه قبل تفكر تكتب موضوع
2-تروح لمنتدى اسمه فعلوني وتكتب موضوع وتقول فعلوني وتتفعل خلال ساعات ان شاء الله</B>
3-بعد ما فعلناك لازم تكتب لنا موضوع مميز ومتكامل من حيث المضمون و التنسيق و الفكره واللي بينقل لنا موضوع حتى لو هو خبر ترا اردى له
((تراك منتب ملزم تكتب موضوع محدد عندك منتديات الاقلاع كلها شف القسم اللي تحب تشارك فيه
واكتب له موضوع ..على سبيل المثال موضوع اجتماعي لمنتدى الاسره ..شروحات برامج
لمنتدى كتاتيب ..تصميم لمنتدى التصاميم..موضوع عياره لمنتدى العيارين..الخ))
3-المواضيع الماصله او ام ثلاث سطور ونص هذي ماحناب مطالعينها حذف على طول
4-المواضيع الرياضيه 
اللي تحوي نقل خبر مانقبل بها ترا حنا نعرف عنوان جريدة الرياضيه الا اذا انك تصيغ الخبر باسلوبك الخاص بطريقة مقلعه يمكن نقبل( ناس تمنن).
5-موضوعك ان وافق الشروط اللي متفقين عليها سابقا" يوزرك صار مفعل رسمي وصرت مقلع صدقي
والحين اذا تمت كل هالامور معك نبارك لك 
وصرت واحد من اعضاء الاقلاع 
</B>
واذا تقول انا والله انسان ما ودي اتعب ولا ابي اتوسط باحد تقدر تاخذ </B>
</B>العضوية الذهبية وتدخل بمميزات مهيب عند غيرك</B>