[مسفر الدوسري]

إقتباس:
الرسالة الأصلية كتبت بواسطة فيصل الخالد
وعندك واحد كوووووووووب شااااااااااي كوشششششششري للمعم مسفر عشان يركز في الاسئله الثقيله


السلام عليكم ورحمة الله وبركاته

تو ما تبارك المكان بوجود ابو عبدالله الشاعر والانسان والاخ اللبق الانيق في حضوره المتالق في شعره والراقي في تواصله


=== وش رايكم فيني من يوم ما صرت مثقف وانا احكي حكي ذرب ميه ميه يا سما صح

ابو عبدالله وفي محاوله مني للهروب من الرسميه اسئلتي

في كل بيت عادتا الاخ الكبير يهمين على الوضع ويحق له ما لا يحق لغيره " تحس اني معاني لاني ثاني اصغر واحد " هل عانيت من هذا الظلم وانت في الصغر باي شكل من الاشكال ؟ وهل سمحت به بين ابنائك ؟

لو اكتشفت موهبة الشعر عن احد بناتك الله يحفظ لك عيالك هل تسمح لها بالنشر ؟

هل كنت تطق احد وانت في الصغر ؟ " هذا اخرة العولمه السؤال ما يجي الا ب تطق ويمكن الاستعاره بتصفق اذا ما جازت لكم تطق

رياضتك المفضله ؟

اكلتك لمفضله ؟

بلدك المفضل ؟

موقف جميل في الذاكره ولن يزول ؟

ذكرى حزينه ولن تزول ؟

مدى رضاك عن مشاركة الشاعر القدير عبدالرحمن الرفيع في لجنة تحكيم مسابقه شعريه ؟

ايش كان مركزك في فريق الحاره ؟

وانت صغير ايش كنت تحلم او لما كان المدرس يسألك في الروضه ايش تبغى تطلع لما تكبر ايش كنت تقول ؟ "اعتقد بتقول طيار احس كذا انك كنت تقول طيار

من هو عدو مسفر الدوسري الشاعر ؟

من هو عدو مسفر الدوسري الانسان ؟

من هو صديق مسفر الدوسري الشاعر ؟

من هو صديق مسفر الدوسري الفنان ؟

عندك سلف 15 ريال ؟

هلا ملاييييين بالذرابه كلها..والحبابه..
متبارك المكان بأهله..وأجمل بركاته يوم جمعني بشرواك
وياليت ياخوي يا فيصل تأجل الشاي الكشري شوي لين أخلص قهوتي بس..إذا ما عليك أمر.
- أنا كنت الثاني بالترتيب بالنسبه لأخواني،كان أخوي اللي أكبر مني (رحمة الله عليه) هادي كثييير،ومهو راعي مشاكل على عكسي لما كنت صغير ،وهو اللي كان دايما يبي الفكه مني ومن أذيتي،كنت أناشبه على كل شي خاصة إن احنا كنا نتشارك نفس الغرفه،ولا ارتاح إلا لما راح بعد الثانويه يدرس برى وترك لي البيت والبلد كلها.
أما بالنسبه لعيالي بصراحه أنا دايما أحاول أنصف المظلوم فيهم،وأرد له حقه.
- الله يحفظ لك غاليك يارب،إيه وش المشكله؟! سواء من الأولاد أو من البنات لو كان عنده موهبه في الكتابه ما أعتقد أمانع في أنه/إنها تنشر،وبالعكس إنا اللي بشجعهم لو لقيت عند أحد فيهم هالموهبه.
- تدري أيام المدرسه لما كنا صغار الموضوع ما يخلا خاصة وحنا طالعين من المدرسه..يا طاق يا مطقوق،ومن باكر بالكثير اللي بعده ،راجعين نلعب مع بعض ولا كن فيه شي صار .
- كرة القدم أكيد،وأحب أتفرج حيييل على كرة السله والجمباز.
- الأكلات البحريه بشكل عام.
- أسبانيا
- كثير المواقف الجميله ولله الحمد،بس أذكر إن فرحة نجاحي بالثانويه العامه وقبولي بالجامعه من اللحظات اللي ما تنّسي.
- من الأشياء الحزينه واللي فعلا ما أنساها..حصلت مع زميلنا المرحوم الشاعر عبدالرحمن الرشود..رحمة الله عليه،أنا ما كان بيني وبينه علاقه مباشره،لكن أخذ رقمي من صديق مشترك،وإتصل فيني ليلة وفاته سبحان الله وكنت نايم مارديت،ترك رساله تقول أنا عبدالرحمن الرشود..وكنت أتمنى أسمع صوتك،لما صحيت الصبح لقيت الإتصال والرساله،وقلت الوقت بدري بكلّمه في وقت يكون مناسب خلال اليوم خاصة وإن إتصاله كان متأخر شوي،فقدّرت إنه من الناس اللي يسهرون،خلال ذاك اليوم وبعد العصر كلمني الصديق المشترك وسألني إذا كان عبدالرحمن كلمني البارح لأنه أخذ رقمي منه وقتها، فقلت له اللي حصل وقلت بكلمه بعد شوي،فقال لي خبر وفاته،فحزنت كثير على رجل كانت أمنيته البسيطه نكلم بعض قبل ما يموت بساعات !!! كل ما أقرا رسالته في جوالي أحزن حزن مو عادي.
- عبدالرحمن رفيع شاعر قدير وله تجربته الطويله والجميله مع الشعر،يمكن فيه ناس ما كانت راضيه حيل عن جدوى مشاركته في البرنامج بس هذا ما يلغي أهميته هو كشاعر،ويمكن اللي كان سبب في إنه ما يعطي كل اللي عنده، الدكتور صالح وسليمان المانع الله يهديهم،كانوا يمزحون معاه وقالوا له قبل حتى الحلقة الأولى من البرنامج،إنتبه تنتقد قصيدة أحد من الشعراء،ترى بعدين هالبدو بيسوون فيك وبيفعلون!!
إبن الحلال صدّق ،وكنت أحاول أقنعه أن الشباب "يتغشمرون"،أبداً مهو راضي يقتنع،وكان يقول :لا يبه،شحقه عاد "أسندر" راسي وأدخل بمشاكل وياهم؟!!!أحاول فيه، يهديك ..يرضيك..أبدا،يا أستاذ عبدالرحمن بيصير شكلك مو حلو قدام الناس،كان يردّ علي: خلّهم يقولون جبان ولا يقولون الله يرحمه.ههههه
- كنت قلب دفاع،طبعا الكباري عدّ واغلط،خاصة من أخوي اللي أكبر مني كان يلعب كوره صح.
- والله كنك تدري!! كنك معاي في الفصل..كان حلمي وأنا صغير أصير طيار.
- والله يا خوي يا فيصل ما أبي أسوي روحي مثالي،بس والله ما في قلبي عداوه لأحد لا كشاعر ولا كأنسان،لأني أجزم إن العداوه تتعب حاملها أكثر ما تتعب الموجهه ضده.
- بالنسبه لأصدقائي كشاعر وكفنان على قولتك،هم كل اللي يكتبون شعر مبدع ويستهويني وكل اللي يخلون بفنهم لحظتي مليانه جمال حتى لو ما كانت لي علاقه مباشره فيهم.
- عندي 15 ريال بس إعذرني محتاجهم،يقولون فيه واحد توه جاي من نيروبي وجايب معاه غزلان باسط فيهم في "سوق الزل" ويبيع الغزال بريال.

محبتي لك ولحضورك الـ غير،