[محمد السالم]

طحت من عيني وانا كنت من عينك
طايح في غلاك ومغمض عيني

لين صار الوفا بأخطائك يدينك
والخطا لا ضلالاتي ولا ديني

مابقى ورد ينبت في بساتينك
من نظر شحّ غيمك عن بساتيني

يكذب الصدق في من قال باغينك
ويصدق الكذب لو باقول باغيني

لا عطورك ولا سلّة رياحينك
عادها في الحقيقة شي يغريني

من تطففت وأختلّت موازينك
مابقى مايثقّل بك موازيني

كانك تشوف بأن الغير شارينك
شفت مثلك بأن البعد شاريني

كنّي أشوف حالك عقب مغرينك
يحصدوا بك غراس زارعه فيني

يكسر القلب شوفك يوم مهدينك
للجفا مثل قلبك يوم يهديني

ولا بقى لك معينٍ يمكن يعينك
كون دمعٍ بصمته كنه يرثيني

لا حداك الظما وأقفت بك سنينك
مدّ غُصنك وتلقى الرّيّ من عيني