السلام عليكم ورحمة الله وبركاته
اسعد الله اوقاتكم
هذه قصيده طوّل الله اعماركم في الرسول صلى الله عليه وسلم وهي 500بيت
الـلــه يـا نـــور مــن جــبــال فــاران
بــان وتــروع مـنــه عـبــاد الاوثــان
نور الهدى يا معشر الإنـس والجـان
نـورٍ تــلالا واهـل مــكـة يـشـوفــون
فـيــضٍ مـن الـنـور الإلــهـي تـــلالا
أيــــات ربٍّ للــخــلايـــق تــتــــالـى
بأمـره تعالـى صـوت حــق تـعـالـى
وقريش في ميت صنمهـم يصيحـون
لـه مـن قـبــل يــولـد عـلامـات ورمــوز
رؤيـا مـلـوك الـفـرس فـي يـوم نـيــروز
ومنها اصطفاق الما على رملـة القـوز
وشمشون ما هو مثله الأمس شمشـون
سـاعة ظـهـر نجـم احـمـدٍ مـا تــوارى
منـه اليهـود استنـوقـوا والنـصــارى
يوم اقفـوا من الغيـظ مثـل السكـارى
كل على كـبـده مـن الـغــل طـاعـون
نجـمٍ ظهـر للعين مـن مطـلـع الـشــرق
بينه وبيـن نجـومـهـا الطــالعـه فـــرق
ساعة ظهر غنّت على عشهـا الـورق
ترقب جموع الناس مـن أيـن يأتـون
وصار استراق السمع ما هوب جـايـز
وتـحـركــت وســط الـقـبـور الـجـنـايـز
وتـلـمـسـن لـصــدورهـــن الـعـجـايـــز
واهل الكتاب من القهـر مـا يريحـون
ورؤيا ربيعة نصر عمـرو بـن عامـر
قــبــل ولادة أحــمــــد والـعــــوامـــر
منهـا رمـت فــرسانهــا كـلّ ضـامـر
ما هيب مثل اضغاث الاحلام وظنـون
يـا حــمـةٍ فــي ظــلـمـةٍ فـي تـهــامــه
عـلـم بهـا (التـبّـع ربـيـعـه) عـمـامـه
وعنها الف قامه ناشدوا والف هامـه
من جن وانس واهل الاخبار يـروون
طـفـل وهو مـن قبـل يـكـبـر وينـمـو
له في السما كل كوكبٍ بـان يزمـو
الناس تنزل تحـت والطفـل يسـمـو
طفلٍ غبطه العـز موسـى وهـارون
(سطـيح) فـسرهـا و (شـقٍ) كـذلـك
إن الـمـمـالـك تـنـتـهـي للـمهــالـك
ويسودها ابنٍ لإبن فهـر بـن مالـك
عقب اربع قرونٍ تلتها اربـع قـرون
وحلمٍ رواه العبد عمـرو بـن مـرة
عن كوكبٍ يضفي على بطـن حـرة
وصوتٍ يقول اطمر ورا كـلّ جـره
للي لكم من غاديات الدهـر جـون
ساعة ولادته اشرف الشمس ابو وهب
لـيـلٍ ولا اخـطـت شـيـاطـيـنهــا الـشهـب
الـخـوف خـلى كـاهــنٍ مـن بـنـي لـهـب
يؤمن عقب شاف اسفل العرش مصيون
ساعة ظهر نجمه كمـا قـال حسـان
كـل اليهـود مـوقــفـيـن علـى شـان
نجمٍ يزلزل حومـة الشـرك مـن دان
وابن اخطبٍ كنه علـى راس حجـون
وفي ارتجاس إيوان كسـرى علامـات
طيحة وثنهم مع سقــوط الشـرافـات
ورؤيـا رآهـا المـوبـذان وهـل الـلات
دلالـةٍ مـنـهـا لحـق ربـهــم هــون
وفي خبر (قسّ بـن سعـد الإيـادي)
وزيد بن عمـرو واعتـراض المبـادي
واربع رجالٍ من مضـر مـا تقـادي
بإسم احمدٍ لأطرف ولدهـم يسمـون
في عام تسع ميـه وواحـد وسبعيـن
تاسع ربيع اول وفـي صبـح الاثنيـن
ميلاد اكرم من وطى القاع يا حسيـن
طفـلٍ عليـه الله وخلقـه يصلـون
يوم انجبته امه عقـب طـول مسـرى
من نور وجهه شافت قصـور بصـرى
وتحطمت صلبـان قيصـر وكسـرى
واصبح هرم فرعون ما سـر فرعـون
قالـوا ملائكـة السمـا يـا أمينـه
سمـي ولـدك احمـد وحبـي يمينـه
وعيذيه بالله مـن حسـد حاسدينـه
(إنا سنجعل منـه مصبـاح للكـون)
هـذا النبـي الهاشـمـي الـنـزاري
فجرٍ سنا صبحـه يبـوج الغـداري
نـور النبـوه فـي محيـاه جــاري
مصباح أهل الأرض يا اهل الصنم عون
في يوم ميـلاده توفـوا هـل الفيـل
وكاهن هل البصره وكاهن هل النيـل
وشافوا هل الساحل طواقي هل الغيل
من نور وجهه والقمـر دون فـي دون
في مولده يا حسين من ضمن الايـات
من أبطن الاصنام يخرجـن الاصـوات
من هاتفـات الجـن وكـل آتـيٍ آت
ياللي تعاتـب عنـد دمّـون دمّـون
تقول_فاطم بنت عاص أمّ عثمـان_:
ليلـة ولادة أحمـدٍ شانـهـا شــان
يكاد نـورٍ منـه يذهـب بالاعيـان
وخفت الكواكب فوق راسي يطيحون
لا جيت الفه باللحاف انقلـب عنـه
كن الكواكب فـوق تبغـى تعاينـه
وصارت اواني البيت مثل الذهب منـه
وشفت الوسايد يزحفن له على هـون
يـا فاطمـه هـذا النبـي المسـمـى
باكر يجيك الصبح بـ(إقرأ) و (عمّـا)
أمـا مـن استكبـر فـ(نـارٌ) وأمّـا
من اهتـدى فيبشـر بتيـن وزيتـون
مـا جـا مـن سفـاحٍ ولا قالـه الله
جاء من نكاحٍ حسـب مـا سنـه الله
يوم العرب في ملكـة الشـرع قلـه
واغلب مناكحهم زنـا لـو يعـودون
هـذا بـن عبـدالله نسـل الأكـارم
والجد عبـد المطلـب إبـن هاشـم
ابـن منـاف ابـن قصـيّ المغـانـم
ابن كلاب الخيـر والخيـر مضمـون
وكلاب بن مره ومـره إبـن كعْـب
ابن لؤيّ الحرّ ابـن غالـب الصعْـب
وغالب إبن فهرٍ وفهـر مهـو لعْـب
وفهرٍ لقبـه قريـش ياللـي تعـدون
بن مالك بـن النضـر آبـن كنانـه
ابـن خزيمـة إبـن مـدرك زمانـه
اللـي ثنـى دون الضعينـه حصانـه
منه اهل وادي الحمض والخمض يخشون
ومدرك هو بن الياس بن عالي الشـان:
مُضر هو اول من حدا قدم الأظعـان
ابن نـزار ابـن معـدّ بـن عدنـان
وعدنان في اسماعيل بعد اربـع بطـون
ابـن براهيـم الخلـيـل بــن آزر
أهـل المقـام المرتضـى والمـيـازر
خلْ عنك حكي أولاد بطرس وعـازر
ما هم بحوله في الشرف لـو يطولـون
واتـرك يهـود الدونمـا والخـزريـا
لو حاولـوا بأصلـه يحولـون الأريـا
إن مـا سقينـا كلبهـم مـرّ شريـا
والا ترانا مثل ابـو الهـول ملعـون
ابـن الذبيحيـن احمـدٍ لـو تعالـوا
ياللي علـى جحـدة محمـد تمالـوا
تعالوا إلـى كلمـةٍ سـواءٍ تعـالـوا
وحاذور عن شمـس الحقيقـه تميلـون؟
يا اهل الكتـاب الله عطاكـم كتابـه
واسم محمـد فيـه مـا هـو تشابـه
ولا زال باقٍ عنـه بعض الكتابـة
غير اللـي اخفيتـوه عنـا وتـدرون
يـا ليتهـم جهالكـم بـسّ تـدري
باللي فعلوتـه أول الوقـت بـدري
ان كان قدني منكم اشفيـت صـدري
واظهرت باطلكم لكم لـو تروغـون
بأذكر بعض ما عندكـم عـن محمـد
في كتبكم يا اهل الصليـب المصمّـد
بتوراتكـم وانجيلكـم عـن تعمّـد
اخفيتوا اسم احمد مع اولاد صهيـون
اغواكم ابليـس بتحريـف الآيـات
كتمتـم الآيـات كتمـان الامـوات
ما مات شيء فات يـا ناقـد الـذات
الحـق باقـي منـه حلـق ولغنـون
يا اهل الكتاب اللي حرفتـم حروفـه
تحريفكـم خلـى عيونه بجـوفـه
وتزويركـم كـلٍّ بعينـه يشـوفـه
وشلون تخفونه عن النـاس وش لـون
احمـد عرفتـوه بعلامـات جسمـه
وبكتابكـم مذكـور بإسمـه ورسمـه
والخاتم اللـي بيـن الاكتـاف وسمـه
شفتوه شوف العين وش عـاد تبغـون
حـق البكوريـة كتمـتـوه عـنـاّ
وسقتوه لأنفسكم بـلا ذنـب منـا
غصـبٍ عليـنـا إنّ بـالأمـر (إنَّ)
وهذاالصحيح وقولوا اللـي تقولـون
يا أمة التـوراة واصحـاب الانجيـل
أحمد ذكـر فيهـا بـأدق التفاصيـل
يا مقرطسين الصبح فـي ظلمـة الليـل
أدلتـي جتكـم عساكـم تـوحّـون
في سفر (حجّي) من ثنيـنٍ لـسبعـه
جاء ذكر احمد واهل الاسـلام ربعـه
وفي لفظ (حمْدَهْ) فـي ثلاثيـن طبعـه
لكنكم عـن كفركـم مـا تتوبـون
وفي سفر (دنيالٍ) بسابع فصـل منـه
حلمٍ تحلم بـه وطـار الكـرى عنـه
حلـمٍ يـأول منـه ظاهـرْه باطنْـه
ما هو حكـي ولادةٍ وبـن زيـدون
يوم ايحلم (دنيـال) بأربـع عواصـف
في وجه بحـرٍ مـا يوصّفـه واصـف
موجه عليه اربـع وحـوش تراصـف
متساويات اعيون واظهـور وبطـون
ليـثٍ مجنـح مثـل مـا تذكرونـه
ودبًّ ثلاث ضلـوع حسبـة سنونـه
ونمـرٍ بأربـع أجنحـه تاصفـونـه
واربع رؤوسٍ بـلا كراعيـن ومتـون
ووحشً قرونـه أربـع فـوق راسـه
ثم يظهر الحادي عشـر مـع أساسـه
ويكسر ثلاث قرون مـن قـوّ باسـه
ويصير مثـل الآدمـي فـمّ وعيـون
وبالكفـر والالحـاد يبـدا يتـفـوه
تـوه بـدا وبغايـة الشـرك تــوه
قرنٍ براس الوحـش شكلـه مشـوه
كنه شرب من خمرة الـراس جالـون
وفجأة يجي الله فوق عرشٍ مـن النـور
عرشٍ سنا نـوره تقـل فـت بلّـور
قدمه يرى نهـرٍ مـن النـور منثـور
حوله ملائكـة السمـاوات يمشـون
ثم يفتحون الكتب مـن كـل خانـه
والوحش ابو قرون احترق في مكانـه
كله يمـوت الا هـك القـرن عانـه
يدعو خلفهم للكفـر ليـن يدعـون
يدعون من جات السحايـب تشيلـه
يمثـل أمـام الله ويرخـي شليـلـه
ويعطيه ملـكِ مـا يوصـف مثيلـه
وتخضع له الدنيا اجمـعٍ روس وقـرون
هو احمد الخاتم وهـو ابـن الانسـان
في لفظ (برناشا) لو انْ فيكـم اذهـان
وتفسيرها في كتبكـم خيـر برهـان
إنه محمـد , لـو تروحـون وتجـون
وما قال فيه اكبر كهنـة آل كلـدان
(دافيد بنجامين) قـسّ اهـل ايـران
اكبر دليـلٍ لـه يزوغـنّ الاذهـان
والا على ويش اهتدي هـو وخاتـون
قال :بن الانسان أحمدٍ ما تبـي شـو
روالقرن قسطنطين لآبـوه مـن ثـور
اللـي بـدا التثليـث دورا ورا دور
وصرتوا معـه باللـي ينـادي تنـادون
وابليس منكم لبّس اثنـا عشـر قـس
ثوب الخزى ما هو حريـرٍ وسنـدس
يا ليت فيكـم بـسّ مثـل المقوقـس
يحفـظ لسانـه مـن علـومٍ تجيبـون
وفي سفر (شعيا) فصل ثاني وعشريـن
صفة محمد مع هـل الخـف والقيـن
وجبال مكـه والحجـر والحجازيـن
لكنكم عـن مكركـم مـا تجـوزون
وفي سفر (عوبديا) وفي سفر (حزقيـل)
وفي سفر حبقوقٍ وفي سفر (صمويـل)
واربع طعش سفرٍ عدا كل مـا قيـل
فيها احمد مذكور بالشكـل واللـون
واما وفـي العهـد الجديـدُ لديهـم
فـي كتبهـم ألفيـن شاهـد عليهـم
وماجائنـا منهـم سيرجـع إليـهـم
وقسيسهم من أكله السحت مبطـون
في سفر (يوحنا) و (لوقـا) و (متّـى)
وفي سفر (مرقس) والروايـات شتّـى
عن احمدٍ مـا يثلـج الصـدر حتّـى
ينام طيـب حـال والوجـه ميمـون
أحمد هو الطفل اليتيـم اللـي اخفـوا
ذكره, وهم في عهدة الرب ما اوفـوا
لله طفـلٍ ساعـة النـصـر يعـفـو
طفـلٍ وهـو لمدوّرالعـون ماعـون
هاك اليتيم اللي على جانـب العـرش
مكتوبٍ اسمه بأمر من يحيـي الطـرش
منجي غريق الموج من عضة القـرش
فـي غبـةٍ سباحهـا مـا يعـومـون
وقولة (بحيرى) عنـه لأقـرب عمامـه
عـن شـأن طفـلٍ ظللتـه الغمامـه
عليـه شـاف مـن النبـوّة علامـه
وقال اجنبوا به من قبـل لا تضيعـون
اللي لقت فـي قربـه امـه حليمـه
غنيمـة يـا كبرهـا مـن غنيـمـة
وهي قبل قربـه لاش خيمـه وغيمـه
عيالهـا مـن شـدة الجـوع يبكـون
طفل ملائكـة السمـا فـي فـؤاده
حطوا له الثلجـه عـوض للسـواده
شقوا صديـره وهـو طفـل وعـاده
صغير ما يدري عـن اللـي يحطـون
هاك اليتيم اللي غشت وجهها الشمس
ومشاعره خطرٍ عليهـا مـن الهمـس
وبرغم ذا ما حشموها عـن اللمـس
لمسة رماح ابنا عمامه لـدى الكـون
وبالرغم مـن هـذا ترضـى عليهـم
وتحمـل اكبـر غلطـةٍ مـن بنيهـم
ولا طاوعه ضامـره يدعـي عليهـم
ولو دعى راحـوا كمـا راح قـارون
هـاك اليتيـم اللـي عيونـه تقاطـر
رحمـه لقومـه كالمـزون المـواطـر
لعيونهـم شـال الأذى والمخـاطـر
ما كنْ بلقبه مـن أذى سبهـم لـون
في ذمتي ما فـي انبيـا الـربّ مثلـه
شال الأذى من لابتـه وسـط حثلـه
حباً وهم بالشيـن كـلٍّ بعـث لـه
ورعٍ يضيق خاطـره كيـف يرضـون
يا ويل قلبـي كيـف يرضـون سبـه
ومثـل هـذا مـا تجـيـه المسـبّـه
للرحمـه انشـا حبّـةٍ فقـو حـبّـه
وخلى عجمها مع عربهـا يتخـاوون
ما به نبـي الا ودعـى بمـوت قومـه
وهو ما لقى ما قد لقى احمـد بقومـه
على كثر مـا شينـوا مـن علومـه
دعـى لهـم بالخيـر فيمـا يريـدون
آذوه في نفسـه وهـو مـا أذاهـم
يـا كثـر والله مـا تحمـل خطاهـم
إليـن ربـي لأجـل أحمـد هداهـم
لكنهـم جحـادة مــا يـوفـون
ربي من الرحمـه خلـق جسـم أحمـد
بثلجـةٍ فـي واقـر الصـدر تجمـد
منهـا عيـون مـدور الشـر ترمـد
لا سلـم الله عيـن نـاس يتعامـون
تــابع