[شهريار]

ليتك تخليني أنام ..

كيف انام ؟؟!
و انا ارتجف مثل الشتا ..
و شباكي المقفول .. يسأل لي متى ؟!
هذا الظلام البارد الملعون ..

لو صرت انا كلي عيون ..
بتصير لي مرايه ..
اشوفني فيها .. !!

همسي المخنوق في سمعك..
صياح الخوف من نفسي ..
و عشقي دنيا من فوضى ..
وباكر نام في أمسي ..!!

و أحكي لك بليا صوت ..
و تحس اني أنا صوتك ..
و أحيا بك .. و أنت الموت ..
و تحيا بي و انا موتك .. !!
و لا تسمع أبد غير ي ..
و لا تلمح ابد غيري ..
واكذب كل كذب الأرض ..
و لا تصدق أحد غيري ..

كان الكلام .. غير الكلام
كان الحكي كله عيون ..
كنت اليقين اللي شنق كل الظنون ..

كان الحزن في عيوني ملح ..
يمطر على ضيقي ..
و لي لامس شفاهي تذوق ..
الشهد من ريقي ..!!

كان الضياع دربي إليك ..
انا اسئله ومالك جواب..
تمردي يصرخ يبيك ..
كنت الوضوح لأغمض عذاب !!

الخوف ..خطوه للورا
و بيني و بينك خطوتين!!
امشي و عمري ما درى ..
إنك مثل ماضي السنين ..!!

اتركني لحالي ..
استمتع بحالي ..
المحك في صوره .
في الذهن محفوره ..
واسمعك في صمتي ..
تدفني في أمسك ..
و وسادتي تحتي ..
ادفن بها جنوني ..
و تسألني ما نمتي؟؟ !!!

النار في صوتك ..
تلعن البرد.. الظلام
موتي أنا موتك ..
ليتك تخليني أنام ..
ليتك تخليني أنام ..

*********