[ابونوت]

الاخ العزيز محمد العتيبي السلام عليكم
اعرف ان الصدى لن يكون مثل الصوت
واعرف من وفائك ان تتغاضا عن التقصير
ازف مع تحياتي هذا الرد المتواضع
على رائعتك التي لا تجارى

يامرحبا ياواردٍ من راس محمود الخصال=يومي على راس الطويل اوماي صيّاح النذير
جيته وانامضمي خبر وادليت فالعد الحبال= وهتال فكري من نباه وجمه العذب الغزير
من صاحبٍ ما في وفاه لمن نصاه ادنى جدال = للطيب وسلوم الرجال يسير بسلوك الحرير
حط الخبر وسط البريد وصار فوق الاحتمال = من كثر ما خط القلم بين العباره والعبير
فيه اعتذار بلا خطا يازين ترتيب المقال =ولاحظت من حزن الرفيق الي شكاشيٍ كثير
يشكي زمانٍ لو صفا لا بد من نوع انفتال = ما يستريح من الهموم الاّ خلي بلا ضمير
وهيض على وردني لمحايل العفر الغفال=اجمع شرايدها واجر الصوت والمعنى يسير
لين ارتهش بين الضلوع وصر لي صرالمحال = وهاضت علي لين استعضت الطاوله عقب السرير
واملي رها واكتب رها واجنب القشر الهزال= أجيبها لو علقت في راس مزمزمٍ عسير
واقول فيهامرحباما هل يامحمد هلال =وما لاح نجم وما هما دمع اليتيم من النظير
يابومهنّا والهنا في عرف سمحين القبال = مهوب عرف الخايبين مبكية ورع القصير
الي صداقتهم تجي على الطمع والاحتيال = دامت مدام المصلحه والى انتهت معها تطير
انا بعرفك كاسبٍ نوماس ياريف الهزال = لو كان ما عشنا سوى موقعك في قلبي كبير
أمّا الليالي يا محمد لا تبرق فالليال = من لافته في عيشته راحت عبوسٍ قمطرير
كم جادلت من واحدٍ حسه على الباقين طال = ليثٍ الى منه زجر والى هدر مثل البعير
حكيم توخذ كلمته كامل ولله الكمال = يقلط الى هاب الردي في كل ما يطري جدير
دارت عليه وجابته من عقب ماطال استحال = هامش خبر ماله نظر فالعير والاّ فالنفير
الله يكافي شرها أم العنا وأم الوبال = ويفكنا واحبابنا من سيف دنيانا الشطير
يابو مهنّا ما بقى كود الدعاء والابتهال = يجبر عزى من يشتكي بين المحاني نار كير
وموقفك ما يحتاج له لفه يمين ولا شمال =موقف وفا وانت الوفا مثل القمر بك نستنير
من لابةٍ عاداتها لا صار للشر اشتعال = ميقافها يضرب مثل يوم الردي ماله مجير
يرسون وان زام الحريب جبال ترسي للجبال= والى عطو تلقى الكرم فيدينهم مثل الاسير

وسلامة الجميع وشكرا لكل من اطلع على هذه
الكلمات البسيطه التي ماهي الاّ جزء بسيط

مما يستحقه ابو مهنّا

اخوكم صالح السبيل