[فيصل الخالد]

الى والدي عبدالله الدبل :

فضفضه من القلب للقبر

كنت مثالي الاعلي وقدوتي في تعاملك الطيب واحترامك لنفسك وللاخرين
كنت الاب الموجه والاخ الحنون والصديق الصدوق ورفيق السفر المرح
فقدتك فقدتك فقدتك فقدتك فقدتك فقدتك فقدتك فقدتك فقدت كل شي
كل مره اروح لندن او باريس اتذكرك واشوفك في كل زوايه اسمع ضحكاتك وسواليفك احيانا اشوفك سبحان الله كنك ترد على تلفونك واحيانا اشوف نظرتك يوم عرس ولدك واذكر كلامك يوم تحضني
رحيلك متعب ومازل كل الي يحبك يعاني منه
تجيني لحظات في الصلاه اذكرك وابكي
غلطنا غلطه كبيره ان صلينا عليك في مسجد المرحوم الوالد لاني كل مره اروح اصلي الجمعه اشوف الباب الي دخلنا جثتك منه "استغفر الله" اسج عن الخطبه وتفاجاني دموعي واضيع في الذكريات المؤلمه
مرت سنتين يابو خالد ودورة الخليج الي انت مت فيها جت مره ثانيه والمنتخب انهزم فيها مره ثانيه كنت متمني نفوز وداخليا محترق كنت اشوفها مع جيمي في لندن وكنت اقوله ابي اشوف اذا فاز المنتخب مين بيذكرك في زحمة الفرحه
مين بيذكر الرجل الي بنفس الدوره ترك الدنيا وترك عياله ورجع من السفر بلمح البصر لعيون بلده وواجبه الوطني

الحياه روتينه من غيرك يابو خالد: شغل .. بيت .. سفر .. قرف .. زحمه .. اعياد مع اني صرت اكره الاعياد صرت اشوف جمعة العيد من غيرك ممله وروتينه ونفس الكلام ينعاد صرت اتعمد ما اعيد في السعوديه قبل اي عيد بيومين اهرب لك اهرب لاي بلد تذكرني فيك وتذكرني بجمعتنا
قابلت محمد بن همام مره في الجيم في كولامبور وسلمت عليه وقعدنا نذكرك ونذكر سوالفيك ونذكر اخر مره تقابلنا فيها وكان يعلق عليك ويقول وليه ما تعلم ابو خالد الجيم بس المره هذه قلت له يا عم محمد المره هذه ما عاد فيها لا جيم ولا غيره المره هذه جثه هامده دمعت عيوني وشفته تصدد عني خليته ومشيت ما سلمت عليه
وقابلت نواف بن محمد بلوس انجيلوس وسلمت عليه قال وش ناقصك يا فيصل قلت عبدالله سكت وطالع فيني قلت له بعد اذنك ومشيت ما سلمت عليه

عبدالعزيز الدوسري ثبت دورتك الرمضانيه جزاه الله خير في النادي وولدك خالد وعمامه قايمين عليها واطلق الله يجزاه خير اسمك على ملعب نادي الاتفاق الرسمي

لا شفت ربعك اكره الدنيا لانك مانت معهم لاني اعرف قد ايش تحبهم وتحب تقضي وقت معهم .....

ابو سالم كل ما شاف ولدك حضنه وقعد يبكي واحنا نقوله يا عم ما يجوز تتعب وتعبنا معاك

بطلت العب تنس وصرت اكره اللعبه هذه لدرجة اني لما اروح الاستراحه احاول ما التفت صوب ملعب التنس لان كل زوايه فيه تذكرني فيك

عيالك بخير ابشرك ... ابشرك خالد ربي رزقه ببنت واموره سالكه مع عمامه في الشغل وفهد على وشك يخلص ويرجع وفيصل توه رايح والله يستر من ولدك فصول وارجوك لا تقول زي ما كنت تقول طالع عليك يا فيصل هذا يابو خالد يسوي له عشره مني

سلطان قاعد يكبر
سلطان يذكرني بنفسي لانه خمس سنوات يوم تفارقه وانا خمس سنوات يوم المرحوم ابونا يتوفى ... كنت معاه مره في لندن وقلت له تعال ياعمي باشتري لك ايس كريم جينا وطلبنا طلع محفظته وقال عمي اسمح لي احاسب قلت له : لا عمرك تطلع محفظتك لا صرت مع واحد من عمامك محفظتك هذه بس لا صرت مع الناس قال: بس ابوي ياعمي كان يخليني احيانا احاسب ... قتلني يابوخالد بهالكلمه قتلني .. وقلت في نفسي كيف ما يعلمك وهو عبدالله الدبل

ااااااااااااااااااااااااااااه يابو خالد ااااااااااااااااااااااااااااااااااااااااااااه

كتمه وضيقة نفس

الكلام ما يكفي والذكريات ملايين

الله يرحمك الله يرحمك الله يرحمك

اسف على كل لحظه ضايقتك فيها
اسف على كل لحظه زعلتك فيها
اسف على كل ثانيه ما بست راسك ويدك فيها
اسف على شكاوي المدرسين مني
وخصوصا المرشد الطلابي تصدق يابو خالد من طيب هالانسان جا في عزاك وذكرني وبست راسه وقلت له تكفى سامحني وحللني صار ملتزم وامام مسجد ما شاء الله عليه وقال لباقي الاخوان بسبب اخوكم فصل تركت التدريس واتجهت لطريق افضل باذن الله

لو تشوف وقفة الناس معنا في وفاتك

صارت امور غريبه جدا بعد وفاتك ايجابيه وسلبيه وانا احتاج لمجلدات اتكلم لك فيها عنها ولكن يكفي كذا وما ودي اضيق صدرك في ناس كنت تعتقد انهم اصدقاء
احنا مسامحين وادري في قلبك وادري انك ان شاء الله مسامح
الله يبيحك والله يرحمك والله يعوضك الجنه والله يجزاك خير على تربيتنا والله يعينا على مواصله المشوار


الف رحمه عليك
الف رحمه عليك
الوعد بجنة الابرار ان شاء الله
نشوفك ونشوف الوالد ونشوف يوسف هناك باذن الله

سامحنا