قالو حقوق القصايد قلت مابـه حقـوق=حقوق الأنسان ضاعت كيف بأحقوقهـا
مدام جاء للقصايد وسط الأسواق سوق=اكيد طاحو جميع النـاس فـي سوقهـا
معاد تتوقف الكلمـات وسـط الحلـوق=ياحظ بعض البشر ماتتعـب احلوقهـا
ياليتها تنسرق ويهون وضع السـروق=غير البلا فالعشيقـه خـان معشوقهـا
ياكم لمحنا بجو الشعر مثـل البـروق=مثل السحابه تضيع وتخفـت ابروقهـا
لو القصايد تكلم تشتكـي مـن عقـوق=من اهل شعـر الأباحيـه ومطفوقهـا
ياليت شعر الفوايد مـن سباتـه يفـوق=من قبل وردة شبابه تيبـس اعروقهـا
قالو لي الناس روق وقلت وشلون اروق=دام أكثر الناس ضاعت في خطاء ذوقها
شعر النصيحه مع الأيام صابه نفـوق=قلتـه وكبـدي تزايـد فيـه احروقهـا
متى على الله يجي للشعر لحظة شروق=وتعود بعض القصايد وسط صندوقهـا