أسعد الله أوقاتكم بكل خير
قصيده تعبر عن وجهة نظر أو فلسفه خاصه بالشاعره أدناه
أتمنى أن تحوز على الرضى والإستحسان
ياغربتك ياقلب عن باقـي النـاس=متـى علـى الله تستـرد الأمانـه
دنيا تشربنا السعاده مـن الكـاس=إليـن تـروي هالعـروق بحنانـه
ودنيا تشربنا المراره مـن الكـاس=إليـن تنبـت بالعـروق الخيانـه
دنيا وأسمه جاء مفصـل بمقيـاس=يكفيك عن توضيح حالـه وشانـه
وياللعجـب محبتـه كالتنـفـاس=نزفـر همومـه ونتنشـق أمانـه
أمـان يادنيـا ولوفيـك خـنـاس=وناسٍ نست مخلوقةٍ وش عشانه؟
أمـان يادنيـا وغفلـه ونومـاس=وتطاول ببنيـان وقسـوه ومتانـه
أمان وحروب ومشاكـل وإفـلاس!=أمـان لكـن .. مافهمنـا أمانـه
قل هيه ياوجدي على راع الإحساس=مع كـل نبضـه تستجـد الإهانـه
في مجتمع فيه الفعل هرج قرطاس=ولاجيت للواقـع يصيبـك جنانـه
نرمي على متن الزمن فعل الأنجاس=مسكيـن ياوقـتٍ بليـا حصانـه
نرفع هممنا وما ألتفتنا على الساس=هل الغلـط مـن أو حنـا كيانـه؟
صرنا عقب قولة قرايـب ولابـاس=ناطى على راس القريـب بميانـه
ول ياصبر صار الفرج عنك دساس=ضاعت مفاتيحـه وضيـع بيانـه
بعض الكلام أشد وقعاً من الفـاس=لكـن نسلـي نفوسنـا بنْسيانـه
وقل هيه ياطيرٍ كفخ عالي الـراس=لا واهنيـك ماتـحـب الطمـانـه
لك ماكرٍ شامخ شموخك ياقرنـاس=ماتحسب حساب القسـى والليانـه
ولك هـدةٍ تهابهـا كـل الأفـراس=وفريستك لا أقبلت شافـت أوانـه
ماينفعك ياخـرب كثـر التدعـاس=ولاينفعـك ريـشٍ نفختـه لعانـه
ولا وآعذابي كل ماهاض هوجـاس=وجتني همـوم القلـب بعنفوانـه
وتسرمد الليل بغـرور وتوجـاس=أن النهـار يجيـه ينهـي زمانـه
ولا ياوجودي وجد من راح عساس=يبـي الربيـع ولاتهيـا مكـانـه
عليـك ياقلـب العنـا والتوجـاس=ومتى ياربـي تستـرد الأمانـه..!
منكم العذر في التقصير ولكم الشكر في التنظير