لا تفرح إن الوقت أسعدك وأعطـاك=لابـد مـا سـود الليالـي تبكيـك
دنيـا تقلـب علـهـا مـاتـولاك=تمسي عزيز وتصبح من الصعاليك
إلى أقبلت تخفي عيوبك عن أعداك=وإلى أدبرت تظهر عيوبك لأهاليـك
اغنم من صروف الدهر كانه امداك=قبل اللحد عن ظاهر الارض يخفيك
وترى التشكي للمخاليـق يشنـاك=يحط من قـدرك ويفـرح أمعاديـك
وكثر التشره يجعل الناس تجفـاك=ولا عاد تلقى بينهم مـن يخاويـك
ولا تمادى في زعل مـن ترضـاك=مادام جاء عاني على شأن يرضيك
والجاهل احـذر لاتجادلـه يبـلاك=في كلمة بيـن المخاليـق تعميـك
والهرجه العوجى لو أنـه تنصـاك=حـاول تجاهلهـا وخلـه تعديـك
واحذر تهزا يافتى بخلـق مـولاك=تشوفهـا باقـرب قريـبٍ يواليـك
ولاتفرح بزودٍ على الحق وان جاك=زودك ترى نقصٍ على حق ذوليـك
وخل القناعه ميـزةٍ مـن مزايـاك=مـع القناعـه كـل شـيً يكفيـك
ولاتخيب هقـوت اللـي تهقـواك=مادام جاء بين المخاليـق ناصيـك
وان جت لك الدنيا على غير مشهاك=أصبر ترى بالصبر تـدرك أمانيـك
لا تأمن الدنيا ترى الوقـت فتـاك=لجا القدر كثر الحـذر مـا ينجيـك
(نديم المجره)