مع اعتذاري الشديد حيث ان هناك اخطاء املائيه بالقصيده واحببت ان اضع القصيده بعد تصحيح الاخطاء ودمتم بخير 00
كلمة الحق
لو كلمة الحق ارتمت في فم عيّل قالها = يا ليت اجل بعض العرب عيـّل ومن عرض العيال
عجزت أعدل ميلها وارخي واشد حبالها = دام السفينه بالبحر؟ وش جابها فوق الرمال ! ؟
مالي ومال المايله.. وقصارها وطوالها = مادمت اصلي وش على لاذن جحا والا بلال ؟ !
ومرايتي تضحك علي كلما وقفت قبالها = صارت شمالي عندها يمناي ويمناي الشمال !
ماني ولد عم ٍ لها .. والخال ماهو خالها = من كوكب آخر ما درى بالشمس والماء والظلال
وحده مهي متربيه ! صعبه تربي عيالها = والناقه الجربا اتهبا ! ما تخاوي فحول الجمال
والمهره الصفرا تحب أطلق شنب يبرالها = جاها على وضح النقا.. كامل ولله الكمال!
والسلعه الجزله حسبنا حسابها وريالها = وبعض العرب تسوى وبعض الناس ما يسوى ريال !
ماكل منهو قال ابي روس المعالي نالها = الطايله صعبة منال . . ووصلها صعب المنال
وانا عرفت الناس واعرف طبعها واشكالها = ومع كل هذا صورتي تطرح علي مية سؤال !
مع كل خطوه رحلتي من فوق شم جبالها = والذيب ما يركض عبث ! وشلون أجل ركض الرجال ؟ !
مهما الدروب تسكرت امشي بها واسعالها = لو القدم تقصر تحلق همتي فوق الخيال
يسعد صباح المرجله . . لو ما فضيت افضالها = يسعد مساء قصيدتي .. آيه من آيات الجمال !
أعيش لجل المرجله .. واموت انا واحيالها = يوم الردي يلبس على ثوب الردا بشت وعقال
أخاوي كبار البلد . . وازرع أمل لاطفالها = انا وقصيدي كلنا .. فدوه لوافين الخصال
والحرب لا شبت يسجل نصرها لابطالها = وكم واحدن اصبح ( بطل قومي ) بلا حرب و قتال ! !
والجندي المجهول لو دمه جرى برمالها = ماسجله تاريخ وما يكتب عن الجندي مقال !
كل المبادي تغيرت ! مال الشريف ومالها = ماعاد نلقى في زمان العولمه لقمة حلال !
دنيا عجزنا لا نعرف اقفايها ومقبالها = وصار احتلال ( امريكيا ) لبغداد ماهو باحتلال ! !
( ياكليب ) هون لا تشب النار وكب دلالها = مادام حتى ( ما ني بقايل ) غدى راعي دلال !
وكلن ( مصوت بالعشاء) ! الله يكثر مالها = وين العشاء ؟ يوم المجاعه نابها في كل جال !
سكة قطو ؟ والا قطار.. الله يزين حالها ! = مشكور يا حزم الذهب جالك مع العالم مجال
في ناظري دمعة قهر.. عين العدو عقبالها = في مهجتي حسرة يتيم ٍ لا عمام ولا خوال
الارض معذوره لو انها زلزلت زلزالها = والشمس لو تشرق من المغرب وتهتز الجبال
وشلون أجل لا قامت الساعه وكيف اهوالها = كل البشر سواسيه اقصارها مثل الطوال !
حلو اختلاف الراي حسب اهل القرى واحوالها = مار المصيبه لا ختلف جارين في رؤية هلال !
يا فرحة ٍ ماتت قبل كف الغدر تغتالها = بالعالم الثالث نموت اما قهر والا اغتيال !
ضاعت صناديق الصدور الغامضه باقفالها = واصبح سقوط الطائرة لاسبابه الفين احتمال !!!